周汶錡（Kathy）聯同妹妹周麗淇（Niki）出席珠寶品牌活動，身為潮流達人嘅Kathy現場除咗分享咗著衫心得之外，坦言今日同妹妹一齊現身都好難得，因為兩姐妹其實好少一齊岀活動。

珠寶係唔少女生愛收藏嘅玩意，而Kathy都係其中之一。但佢收藏珠寶除咗為保值之外，原來都係為兩個兒子將來做打算， Kathy：「將來兩個兒子長大啦，娶老婆嘅時候都可以比佢哋，我覺得可以for下一代，都係一個好珍貴嘅過程。」

嚟緊星期日就係母親節，Kathy又期唔期待兩個兒子會準備禮物送俾佢呢？Kathy表示：「老公就應該就會送花，咁今年比較特別少少啦，兩個仔仔就一齊慶祝，又可以識講媽媽啦佢哋，最重要可以同埋自己媽媽一齊渡過，因為做咗媽媽之後發覺媽媽真係好偉大。」Kathy更表示今年相當難得，因為可以四代同堂一齊過母親節。