識架妹，係好多香港男士每次去日本旅行時都想達成嘅目標，ViuTV節目《瀛知有密》就有一招秘技傳授各位，只要對架妹講出「你好似神戶人」，包保你氹到啲架妹開心到見牙唔見眼，對你好感度大增！P.S.只限土生土長大阪人。

是咁的，聽聞無論大阪靚女定係大阪大媽，總之大阪女性只要聽到有人讚佢哋似神戶人，佢哋都會勁Happy。於是，節目《瀛知有密》就走訪到大阪街頭與鬧市，上至師奶大媽、下至年輕辣妹，通統向佢哋講：「你好似神戶人。」測試證實，十個有十個聽完之後都勁大反應，開心到紅都面晒，仲立即同街訪主持親密度大增。

究竟點解會咁嘅呢？原來喺大阪府居民眼中，認為大阪女性，特別係大媽級，又肥又粗魯而且專門著豹紋衫。咁樣講起上嚟，難怪電子遊戲《人中之龍0誓約的場所》中會有穿著豹紋裝的歐巴桑出現啦，官方更將呢種女性形容為：「典型大阪歐巴桑，頂著燙得捲捲的頭、穿著花俏的衣服直接插隊的大嬸。透過與近鄰主婦閒聊，培養出的聊天能力不容小看！」照咁睇，對架妹講「你好似大阪人」話唔定係相當不禮貌嘅說話。

另外，大阪府居民則認為神戶人站在潮流尖端，人人都好識著衫，仲要天生麗質身材窈窕，最重要係大阪人覺得神戶人個個都散發出有錢人嘅感覺。換言之同大阪女性講「你好似神戶人」，即係讚佢哋衣著有品味、身材好好、出身富貴，簡單而言就係白富美啲friend。

想識架妹嘅巴打們，去到大阪識做啦！