《西遊記》呢套經典小說真係已經N次被改篇成影視作品，可以話拍到爛，但係外國人嚟講呢個題材就似乎好新鮮，上年有澳洲電視台就拍咗套劇叫《西方西遊記》（The New Legends of Monkey），套劇最近就喺Netflix度上咗架。正所謂好奇心害死貓，我唔識死咁去睇咗張Poster，結果真係嚇咗一下。你搵妙齡少女做唐三藏，Okay，日本之前都開咗先例，但我唔明因乜解究沙僧會係金髮美女，而最離奇嘅係孫悟空得頭殼頂有毛……咁佢仲算唔算係Monkey King。

上網睇咗啲Comment，好多人都踩到套劇一棟都冇，其中微博裡面就有網民套劇直情係「毀三觀」，即係世界觀、人生觀同價值觀。我半信半疑咁開咗第一集睇，真係發現成個故事真係畀澳洲人改到體無完膚。故事一開始，智者就帶住唐三藏入屋商討反抗惡魔大計，點知惡魔搵上門仲秒殺晒佢哋，但有個女仔就走甩咗，之後佢仲偷返俾惡魔搶走嘅金箍，爬咗上山笠落孫悟空度，開展冒認唐三藏嘅生涯。當孫悟空俾惡魔打到一仆一碌時，少女三藏就畀咗支縮細咗嘅金鋼棒佢，孫悟空即刻開心到錫三藏個咀仔一啖。

嗰一刻，我即刻喺心底裡問發生咩事，做乜會同認知嘅《西遊記》咁唔同，又好想知到底劇情之後會發展成點，於是我繼續睇落去，當中就發現好多位都係估唔到之餘仲為觀眾帶嚟唔少驚喜。喺《西方西遊記》裡面，都有好多原著以及改編作品出現過嘅妖怪，好似喺張衛健版嘅《西遊記》出現嘅夢魔，喺呢套劇裡面都有出現，而且仲要係一個梳油頭、著神父衫嘅金髮男，真係幾出人意表。之後劇情亦都有出現蜘蛛精，不過呢班蜘蛛精就唔係玩色誘，亦都好難話係性感，因為佢哋係一班長居森林嘅幪面忍者……

就係咁，我喺Keep住有驚喜咁睇哂成季，但其實我未睇之前係抱住隨時棄劇嘅心態，咁樣無啦啦睇哂係完全始料不及。撇除佢改到原著痴線呢樣嘢，呢套劇不失為一套幾有趣嘅作品，雖然打嘅場面稱唔上一流，但起碼有諗過度過絕對唔係Hea咗你就算，當然啦，我哋呢班觀眾俾香港動作片餵到馴哂，一定會覺得到喉唔到肺。啊，有樣嘢都好值得一提嘅，就係飾演孫悟空嘅澳籍泰裔演員Chai Hansen真係超大隻，條人魚線真係令男人驚訝、女人心動。人魚線？係呀，你冇聽錯，佢會喺套劇度剝衫，鍾意睇大隻仔嘅人真係唔可以錯過。