【食平D】常被肥媽於節目中催婚 陸浩明指行動升級：依家係催生
撰文：洪曉璇
出版：更新：
蔗渣價錢燒鵝味道，性價比高嘅嘢大部分人都唔會抗拒，所以肥媽同陸浩明主持嘅《食平D》系列拍完又拍，添食完再添食，令佢地成為師奶界熱捧偶像。近年陸浩明深得肥媽真傳，人氣急升成為廚房界紅人，被邀請出席重慶火鍋店開幕典禮，台上更即席挑戰重慶火鍋招牌湯底，為酷熱的天氣增添火辣氣氛。
陸浩明與舊拍檔鄭文一齊出席活動。
陸浩明透露同肥媽主持嘅節目已完成拍攝工作，終於有時間搵真銀：「肥媽依家應該周遊列國探孫，佢屋企人咩國籍都有架！（有冇興趣同肥媽一齊做生意？）都想架，可能開糖水店，因為私房菜太困身，肥媽主力係湊老公同孫，拍節目都係副業。」
肥媽同6號做節目，除咗學煮餸，睇佢地互窒其實都好好笑。（影片截圖）
講到經常被肥媽於節目中催婚，陸浩明就話對方已經行動升級：「佢實在太開明，所以依家唔催婚，直接叫我生小朋友，依家肥媽係催生！（咁計劃今年結婚？）今年趕唔切喇，本來想買左樓先結婚，但係樓價日日升，拍完節目再睇又升好多，所以要等等先可以置業！」。
無論結婚生仔定買樓都要用好大筆錢，相信陸浩明最想就係多D搵真銀機會。