【Trip精】長腿少女旅遊達人Kanya遊摩洛哥慘被抽水：冇人肯幫我

ViuTV節目《晚吹 – Trip精》最新一集請來窮遊達人肯亞少年（Kanya）大談她在摩洛哥和尼泊爾兩國的旅遊經歷。大家不要以為肯亞少年是個專玩長跑的男生，其實她是個擁有健康膚色的長腿美少女。節目中她便向三位主持人嘉欣（蔡嘉欣）、Ming仔（梁嘉銘）和Jerry C（陳國熙）透露自己曾在摩洛哥被當地人抽水：「坐長途車時隔籬有個男人，佢問我喺邊度嚟，好似好友善咁，我傾傾下就覺得好攰話想瞓覺，然後佢都話瞓。佢瞓瞓下就放咗隻手喺我大髀度，我就即刻拍開佢，然後好大力打佢，但佢繼續扮瞓，我有鬧佢話繼續係咁會報警，其實成車人都聽到我大叫，但係冇人幫我。」不過Kanya之後都有話其實摩洛哥普遍都非常友善。