相信好多人都知「大埔Lulu」董嘉儀最鍾意做運動，尤其是跑步，但不是每一位都知她曾經有段時間因為食得太多兼懶得郁動，搞到條腰去到26吋，成條腰唔見咗！不過，董嘉儀最近便在網上宣佈自己終於搵返條腰，更貼出一張度腰相，證明自己腰圍去返22.5吋，接近幾年前做Model時期的A4腰（22吋）：「雖然體重唔代表一切，但我都想健康同有個Fit啲嘅身型，經過大半年嘅運動同健康飲食，今日我終於有返條腰仔啦，22.5吋腰，繼續努力呀，下個目標係有線條。」

一星期三日運動　主力做Pat Pat操練

其實要腰圍在大半年時間減走3.5吋（8.89厘米）並非易事，特別是起步點相當高的情況下。到底董嘉儀是如何減得咁快？她接受《香港01》訪問時便：「呢大半年我真係好乖，Keep住做帶氧運動同重力訓練，一星期至少三日做運動。」多以跑步消脂的她就指在重力訓練主要練Pat Pat：「因為下身瘦，上身自然都會瘦，好多人以為瘦腰最主要係做腹部運動，但教練就同我講做腿時會自然收緊腹部，都會練到個腹。」

水果蔬果不可少　食牛油果三文魚

不怕練Pat Pat練到變歐美風格巨躉？董嘉儀笑謂：「我哋亞洲女仔好難練到咁，不過呢，個Pat Pat挺啲，望落個線條好睇啲，感覺對腳都長啲，着牛仔褲時會好靚！」那麼飲食方面有甚麼地方要注意？她答謂：「我早餐會食豐富啲，多數食牛油果、麵包同提子乾，再飲多杯豆漿。午餐都會食飯，清湯米粉比較多，多菜少肉。夜晚就食少少嘢，好似水果咁，好少食高澱粉質食物。」至於會唔會食時下最興的「超級食物」，董嘉儀答謂：「牛油果、三文魚嗰啲一定食。（亞麻籽同奇亞籽呢？）未試過呀，知道都好多人都話好飽肚。」