【鋒味前奏】霆鋒自細愛蒲機舖 自爆：同王晶一路打機一路傾劇本
人誰無年輕過，即使含住金鎖匙出世，十幾廿歲時總做過一啲勁青春嘅事，例如無晒零用錢點算好，蒲機舖網吧有咩趣事。上個禮拜嘅《鋒味前奏》講到霆鋒戶口試過一百蚊都冇，今集霆鋒就講下自己可以幾自閉，同佢一齊主持節目嘅導演火火就問咁而家嘅霆鋒仲係唔係咁呢？霆鋒話：「而家嘅我都係好宅，我諗我三個禮拜唔出街絕對冇問題！就算出，最多都係買餸，如果有人幫我買嘅話，就一步都唔駛踏出家門。」霆鋒仲話喺北京嘅話，一個禮拜四至五日都係去街市、超市，「我鍾意企喺度發吽逗，其實我好享受嗰種寧靜。」
咁鍾意宅喺屋企，火火就同霆鋒嚟個快問快答，火火講一連串香港地方名，睇吓霆鋒有冇去過。首先係赤柱大街？霆鋒話：「梗係有啦！我以前住過嗰邊㗎！」青衣戲棚？「拍戲可能有，之後就冇。」女人街？「一定有去過，可能好細個囉。」新都會廣場？「未去過，我聽過個名，但唔知喺邊度。」動植物公園？霆鋒尷尬咁笑，「我未聽過。（火火問：兵頭花園你有冇聽過？）冇啊。」
謝霆鋒衣架掛意粉後又一力作 Chef LeMon車頭冚煎蛋成唔成功？
雖然霆鋒嘅答案有啲出人意表，但係原來佢都會蒲啲好貼地嘅地方，好似深水埗同灣仔機舖，真係估佢唔到，「會去黃金商場買game。十零歲嘅時候我會落去機舖打機，到廿零歲都有，嗰陣時入咗行啦。我會企喺打機嗰個人隔籬跟機，等佢打晒擺喺機上面嗰棟錢。我會翹埋對手，望住佢，一副好唔耐煩嘅表情，要俾佢知道：『你打得麻麻哋呀，快啲起身俾我打啦。』咁嗰個人就翹番對手擰轉面望住我，哈哈。」
不過最搞笑就係導演王晶會落機舖搵佢一路打機一路傾劇本：「我以前去得一間最多嘅機舖喺灣仔英皇道對面，而家變咗個超級市場，落地底，幾千呎㗎！嗰陣時打足球game。阿王晶導演要嚟搵我，擺一袋遊戲卡喺度，嗰陣時我哋就係一路打機一路傾劇本㗎啦。個情況就係，佢問：『咁你拍唔拍啫？』我：話『⋯⋯好吖，拍呀，仲有邊個呀？』『咁幾時開呀？』但我哋對眼係一路望住個mon，隻手不停㩒掣，嗰陣時我哋係咁樣傾劇本㗎。」