力不到不為財，如果生意當中加入自己設計同無限心意，見到有人欣賞嗰份興奮真係有錢都買唔到。呢日TVB舉行嘅慈善義賣活動中，見到陀住8個月BB嘅巨肚孕婦陳倩揚（Skye），落手落腳做生意，SELL客拎貨收錢樣樣親力親為。佢接受《香港01》訪問時表示：「呢次部分收益捐作慈善用途自己當然支持，加上啲產品自己有份設計，見到咁多人光顧真係好大滿足感。」

【一家五口】陳倩揚宣佈三度懷孕　陀B去北海道遇大風雪

自家設計媽媽用品眼見倩揚籃球咁大嘅肚，又收錢又烏前同客人合照，睇見都牙煙，老公又會唔會好擔心呢？倩揚影笑言老公相當支持，早兩日仲到場一齊睇檔添：「老公頭先送我嚟，今日星期日諗住佢陪下兩個囝囝，我就同拍檔經理人喺度囉。（呢堆新產品係咪加入好多自己idea？）係呀，餵奶巾係我建議，啱晒餵人奶嘅媽媽，仲有啲A Line Tee，比較鬆身，大肚婆又著得少女一樣都得。」一提到自己嘅心血，倩揚真係特別興奮。

BB同上兩胎差不多重仲有5個星期左右就到預產期，現場目測倩揚個肚真係大得好誇張，原來唔少媽媽Fans都有留言請教，問佢食開咩補品，倩揚就趁機澄清一番：「其實今次我只係肚size比較大，但入面BB同頭兩胎差唔多，依家大約4磅幾差唔多5磅，只係正常SIZE多少少唔算係巨B嚟架﹗我唔係好主張谷到佢變巨B因為會順產，個肚顯得大主要因為肚型、BB瞓前啲睇落又會大啲。好多媽咪留言話我知，個肚同人比好似細咗啲感到擔心，我都會同佢地講最緊要醫生話無問題就OK。」

冇特別去進補BB健康當然放喺第一位，不過做女人貪靚本屬天性，如果可以好似倩揚咁肥胎唔肥人就更好啦，有無咩媽媽餐單可以同讀者分享下呢？「最緊要均衡飲食，避免食油份高同煎炸嘢，仲有多菜少肉，菜同肉比例大約8比2，但當然食少咗肉就要注意其他方面攝取返足夠營養，可能食啲補充品最緊要問返醫生或營養師。」

「其實我自己無乜飲咩補湯，中醫唔太建議懷孕時太補，之前我都有問醫生使唔使燉啲花膠呀海參冬蟲草，醫生都話少少得架啦唔好補得太勁，順產的話SIZE中等會比較理想，生產時無咁辛苦。」