【像我們一樣年輕】陳瑤化身天才女廚師 女二竟然係「靖王妃」？
撰文：郭芷晴
出版：更新：
陳瑤化身天才女主廚，畫風有啲似《美女廚房》！
內地暑假檔期開始，電視劇方面競爭激烈。除左以張柏芝重返小熒幕做主打嘅《如果，愛》一路領先，另一套針對年輕觀眾嘅青春勵志劇《像我們一樣年輕》亦悄悄追緊上黎。劇情大致圍繞由陳瑤飾演嘅天才主廚楊曉柔及由陳翔飾演嘅富二代高興發展，講述原本青梅竹馬的楊曉柔及高興長大後漸行漸遠，後來因為要共同承擔金牌餐廳二次創業的責任，重新踏上追夢的旅程。
係內地類似嘅青春偶像題材多到泛濫，《像我們一樣年輕》憑咩跑出？咁就要提到飾演女一嘅陳瑤。大家對呢個名也許冇咩印象，但如果提到幾年前係香港熱播嘅《無心法師》入面嘅女妖岳綺羅，相信大家都唔會陌生。有呢位90後新生代女演員坐鎮，再加上以烹飪為題材，靚女加色香味俱全的畫面都好吸引眼球。劇集播出沒多久，有一場曉柔和高興在雨中的戲，陳瑤要一路淋住雨一路演喊戲，獲讚演技自然打動人心，可見陳瑤係一位有顏值有演技的演員。
陳瑤陳翔呢幕雨中喊戲好牽動人心。
除左陳瑤，女二盧杉都係一大亮點。唔講唔知，係劇入面飾演高冷女總裁高雅的盧杉，竟然就係內地神劇《瑯琊榜》入面溫柔賢淑嘅靖王妃柳氏！面對兩個反差如此大的角色，盧杉都演得有板有眼，駕輕就熟，令網民大呼有新鮮感，重新認識了可塑性高的盧杉。
由盧杉飾演的高冷女總裁高雅。
盧杉原來就係靖王妃，失敬失敬！
至於男主角就由陳翔擔當，不過他先前被曝瞞住前女友毛曉彤偷食，被封為「渣男」，多多少少影響左觀眾收看的慾望。以戲論戲，陳翔目前的表演不過不失，就睇下佢之後可唔可以憑實力贏返啲粉絲。
又有俊男美女，又有佳餚美饌，難怪《像我們一樣年輕》都吸引到唔少觀眾的青睞。劇集目前已差唔多播到一半，大家有冇興趣追看呢？