要數00年代組合，除咗Twins、Shine、Cookies等，仲有由關智斌（Kenny）同張致恒（Steven）組成嘅Boy’z。2003年Boy’z正式踏入香港樂壇，加上Kenny同Steven的俊俏外表，出道即吸納大批女粉絲，橫行組合界。

適逢Boy'z出道15周年，日前（17/6）Boy'z擔任張敬軒紅館演唱會嘉賓時，全場起鬨，昨日（19/6）軒仔再度邀請Boy'z上台合唱時，宣布Boy'z即將會開首個售票演唱會！

而家就同大家重溫那些年聽的Boy'z經典歌曲~

《LALA世界》

《LALA世界》是Boy'z2003年的首隻主打歌，MV喺沙灘取景，充滿夏日感的輕快曲風，加埋洗腦嘅chorus嗰32個「LA」，不自覺都會「LA」埋一份。

《跟蹤你》

呢首歌MV邀請到樣子清純嘅Isabella（梁洛施）做女主角，講嘅係喺街上邂逅心儀對象，但又唔敢埋對方身，帶出青春期對戀愛嘅憧憬。

《手足》

除咗唱情歌，Boy'z呢首講兄弟情嘅《手足》相信好多男士喺00年代都聽過。正所謂兄弟如手足，兄弟之間嘅情義唔係咁容易表達出嚟，就好似歌詞提到「手足只得兩個字 所以只有兩個知 今晚很想見見面 想散心 心照得你可以」。

《死性不改》

呢首經典作品係唱K必唱歌曲，一句「人天生都不可以愛死身邊的一個」就已經唱出愛情嘅悲哀，每次分手都要狂loop幾十次。推出一年後，仲搵埋Twins推出合唱版本，再將呢首歌推上高峰。

《眼紅館》

一聽到「Ho~Hey~Ho~」就會諗起《眼紅館》，呢首中板慘情歌有節奏得嚟帶點哀怨。雖然歌曲係講失戀，但就以紅館為主題，好可惜Boy'z過往只以嘉賓身分踏上紅館，唔知道今次Boy'z會唔會如願以償喺紅館開show呢？