劉愷威昨日（1日）罕有現身紅館擔任回歸祖國21週年晚會嘉賓，對上一次大家見到劉愷威喺香港唱歌，就喺古巨基演唱會上，而今次再喺紅館見到佢，阿威就表示其實今次好驚好緊張：「上次做基仔嘉賓時候其實都只係負責搞亂擋，今次係一個嚴肅場合其實自己又開心又緊張， 尤其是紅館對其他人嚟講係一個好特別嘅地方。」

大家見番劉愷威相信都會有一種感覺就係：「咦，乜佢唔係大陸發展㗎咩？」，阿威佢都表示唔知道大家宜家見到佢會有乜反應：「見到我大家會唔會覺得好奇怪呢？點解會喺到呢？不過最開心係可以見番喺香港嘅老朋友。」阿威講到咁其實自己係咪都有意回港發展事業唔賺人仔呢？阿威就表示當然希望，點解呢？佢就講到：「因為女兒又喺香港居住啦，而自己又可以收工就番屋企照顧女兒，其實都好爽。」

早前阿威上內地節目時談及家中女兒，竟然差一點流下男兒淚，點解咁激動呀？係因為愛呀定責任呀？阿威就回應：「感動啫，我忍住㗎，因為女兒畀到好多新啟發畀我，當然每個父母講起自己小朋友係充滿愛啦，嗰一個節目係比較煽情，同埋節目都比到回憶我。」而阿威嘅小公主萬千寵愛在一身，會唔會都想有一個弟弟妹妹一齊分享一下呢？阿威就表示佢從來冇提想要弟弟妹妹，會唔會生多一個小朋友就隨緣啦。