Angelababy樣貌精緻成個洋娃娃一樣，加上經常著住天價禮服公主出巡嘅氣勢，外界一向覺得Baby係驕生慣養唔捱得苦。愈係俾人睇低愈要証明自己，Baby喺《奔跑吧》錄影每次都相當搏命，最近又參與另一個真人騷《嚮往的生活》，洗碗落田甚至劈柴都親自做不假手於人，不過網友焦點就落咗喺佢套衫以及字跡上。

內地真人騷《嚮往的生活》每季邀請3至4位演藝界人士，去到鄉村民居「蘑菇屋」生活，嘉賓必須透過幹農活等方式換取食材與資金，並利用民居裡僅有嘅傳統生活用品，過自給自足生活。第二季節目去到第13集，搵嚟Angelababy以及倪妮擔任嘉賓，兩位於15年上映電影《新娘大作戰》合作繼以成為好閨蜜，呢次孖住參與真人騷亦令網友相當期待。

節目組於微博公開多位參與藝人嘅手寫留言，各人字跡意外引起熱烈討論。女星當中新任杉菜沈月同鬼鬼吳映潔嘅字體都相當靚，大小適中相當秀麗，黃渤嘅唔止有一手靚字，畫畫都好靚呀。至於Baby寫上唐朝詩人王建詩詞：「 雨里雞鳴一兩家，竹溪村路板橋斜，來到這樣一個地方，還有世界級的小提琴，還有世界級的紅燒肉，心裡就兩字『滿足』，謝謝，嚮往的生活！」拋書包顯文學修養，但字跡估唔到同佢外表一樣相當「幼嫩」，似足小學生寫字。

兩位女神喺節目中放下身段落手落腳工作，洗碗執拾都有板有眼，而佢地身上嘅衣著都被放大注視。同為悠閒裝束，倪妮著上橙色Tee加Zip up外套，扎起馬尾行運動風，Total Look啱晒落田。反觀Baby就行少女悠閒風，長直髮配空氣瀏海，白Tee黑褲配長身格仔外套，同街上少女無異，不過眼利嘅網友就認得呢件外套係Faith Connexion 2018年系列，要價四千幾蚊﹗難怪劈柴落田時，Baby都要扎起甚至除去件外套，唔知係熱得滯定係怕整污糟件靚衫呢？