陳倩揚巨肚今卸貨 8磅囡囡順產出世：好似仲痛過上兩胎
撰文：洪曉璇
出版：更新：
生兒育女到底係生一個俾晒最好嘅嘢，定係「兩個就夠晒數」？前香港小姐陳倩揚就話兩樣都唔係﹗已育有兩個囝囝嘅倩揚，陀第三胎終於追到個女，之前仲挺住大肚為善事出力，今日（7月11日）終於誕下千金，母女平安，BB足足8磅重相當可愛呀﹗倩揚產後接受訪問時話：「醫生放囡囡喺我心口時，好實在又好感動，暖笠笠嘅感覺永世難忘。」
陳倩揚囡囡順利出世啦﹗
【巨肚媽媽】陳倩揚挺8個月孕肚擺檔做善事 分享肥胎唔肥人秘訣
醫生話BB隨時可以出世，倩揚月初都已經親自執好走佬袋。（陳倩揚FACEBOOK）
倩揚雖然已是兩子之母，到今次第三次懷孕，仍難免有點緊張。因為醫生早早已表示今次倩揚懷胎非常足磅，七月頭已經隨時生得，但早幾日丈夫要同大仔往日本參加交流活動，倩揚只好搵媽媽到家中相伴，好在囡囡相當聽話，等埋爸爸返香港先出世：「多謝大家支持同祝福，其實前一兩日已經有預感就生得，因為大仔同爸爸9號晚先返港，尋晚食完晚餐食埋糖水就開始作動，拿拿聲去沖涼洗頭，同小朋友講埋故事氹佢地瞓覺先去醫院。」
倩揚笑言阿囡好聽話，等埋爸爸返香港先出世。
兩個囝囝相當期等同妹妹見面。
今次倩揚同樣選擇順產，雖然有兩次經驗，但再次面對十級痛嘅挑戰，臨門一刻仍不免緊張：「成個過程由痛到生都算順利，到醫院已經開咗2度，好快就入得產房然後BB順利出世。但嗰種痛真係難以形容，好似仲痛過上兩胎﹗多得老公一直喺身邊支持，見到阿女出世，醫生放喺我心口時，感覺實在又好感動，暖笠笠嘅感覺永世難忘。兩個仔今朝已經打嚟問妹妹出咗嚟未，相當期待一家五口見面。」
倩揚表示好期待一家五口影全家幅，再同大家分享。
+2