容祖兒拍廣告不停NG 張敬軒食到成肚雞飽到暈

撰文:
最後更新日期:

容祖兒同張敬軒呢對「閨蜜」真係好鬼friend,舊年一齊開騷、上個月軒仔紅館演唱會頭場搵咗祖兒做嘉賓、又齊齊去日本旅行,又同一間唱片公司,雖然係咁,但原來佢哋從來都冇一首正式嘅合唱歌,最近終於有零的突破,孖住拍廣告兼唱主題曲。呢幾日佢哋就喺社交網站就不停post啲NG片、off take出嚟。其實無論拍戲拍劇拍廣告,識睇一定睇NG片,分分鐘仲好笑過出街嘅版本㗎。

原來識咗咁多年Joey同軒仔先有第一首合唱曲。

係人都知祖兒同軒仔勁friend,兩個撞埋一齊除咗笑料百出,仲會經常互窒。好似佢哋之前拍廣告,祖兒要介紹一款醬汁時,就突然被軒仔截住,仲好認真咁同祖兒講,要講啱個醬汁名:「我已經食咗四、五盒雞啦,唔該你今次講啱個汁名。」最後祖兒吸咗一口氣,終於講啱。

都話NG永遠先係最好睇架啦。

除此之外,軒仔拎住盒十八件雞話驚食唔晒時,祖兒話可以叫「十兄弟」幫手,軒仔碌大隻眼話佢邊有「十兄弟」時,祖兒即刻接上:「冚家軒呀!」原來係講緊軒仔之前搵嚟十個同自己似樣嘅fans一齊聚會嗰「十兄弟」,可能見軒仔反應好玩,向來諗到乜就講乜嘅祖兒就繼續話:「如果仲唔夠嘅,叫埋阿關……」點知最後被「滅音」。呢個時候,軒仔靈機一觸:「關……你咩事呀!」然後㩒住祖兒餵佢食雞,十分搞笑。而當祖兒教軒仔跳薯條舞時,因為動作似拜神,祖兒就話:「我哋而家試吓拜神舞吖。」跳咗幾步,軒仔就爆肚:「七月,唔怪得之隻薯條要七月出啦。」最後大家都忍唔住笑起上嚟。

JOEY跳舞見得多,軒仔跳到拜神一樣真係未見過。

+6
+5
+4


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。