雷凱欣分享湊仔點滴　為偷時間化妝放BB入洗衣機被鬧爆

BB初出世只係會食同瞓，照顧好呢兩部分還最多都係瞓少啲，到BB日漸長大開始識行識跑，挑戰先真正開始，真係去洗手間嘅時間都變得奢侈﹗34歲嘅雷凱欣淡出娛樂圈後，最近先剛剛承認已為人母，仲分享同囝囝合照話要「加入炫娃行列」，點知事隔幾日就曬B曬出事啦，Vonnie居然將囝囝放入洗衣機，俾網民鬧爆虐兒﹗

今年2月鄭希怡喺日本街頭撞到Vonnie一家，令佢已婚仲有埋小朋友一事曝光，早幾日Vonnie上載同囝囝合照大方承認已為人母。呢日佢上載一張囝囝相片，Jaxass居然企喺開蓋式洗衣機入面﹗Vonnie留言話：「屋企用開大眼仔洗衣機，今日喺日本嘅屋企發現開蓋式嘅洗衣機嘅好處﹗當你化妝ing嘅時候，原來可以將呢個”痴媽根”嘅小朋友放落去企喺你隔離，又唔怕跌親而佢又可以望住你，一舉幾得﹗」仲加上HASHTAG「有工人嘅你係唔會明；長期有人痴實條腿；放地下仲危險；牛咁眼望到實，一秒都無行開；佢企得好開心，無開開關制，企得好乖乖；都只係放左一陣間好快抱番起。」

雖然Vonnie講明無開制亦只係放咗一陣，不過依舊惹來網友鬧爆，話佢為呃LIKE作出不良示範「學壞咗自己爬入去就大鑊！」、「癡線！係咪可以告佢疏忽照顧兒童或虐兒！」面對網友猛烈抨擊，Vonnie一日後再度Update IG，寫上：「世界很大人類很渺小，我們何不把心門打開，去接納更多姿多彩的事情。如果在這個世界上有另一個我，她會是最了解我的而不是你，為何不把每分每秒好好運用，多給微笑多集合不同的能量，我相信多彩的世界令人更開心。」最後寄語一句：「放鬆d啦香港人」。