一連十集嘅《森美旅行團2》繼續由森美帶隊，聯同隊友麥美恩、吳若希、丁子朗（Karl）去到港人最愛嘅大阪、京都以及和歌山人食玩買。

雖然上一輯嘅高Ling同心穎BB無得留底，但換上嫩口嘅丁子朗一樣有吸引力。港男出身嘅丁子朗，身形有返咁上下，曾於《歎得好健康》大騷人魚線嘅佢，今次跟團更玩埋終極全裸，同森美去浸溫泉同電氣風呂時，入鄉隨俗全裸上陣，兩男肉帛相見，就連森美都忍唔住大讚丁子朗超fit，不過丁子朗入浴時，就因為受到電流影響，搞到全身都硬晒，更被森美笑佢血氣方剛。其實自從大台出現禁色令之後，男藝人露肉機會愈來愈多，就連《3日2夜》亦開始加入男主持，就好似最新一輯嘅蘇梅島篇，就安排了《東張西望》主持潘梓鋒爆肌演出。

曾經都係瘦底嘅丁子朗，因為受到室友影響而開始健身。