Supper Moment挑戰特奧運動員玩地板曲棍球：都係做番音樂好啲！

樂隊Supper Moment成軍12年，終於一圓夢想，於11月舉行首個紅館演唱會。正為演唱會積極備戰的Supper Moment不忘社會責任，早前特意抽空，參與保險公司與香港特殊奧運會（特奧）合作宣揚社會共融計劃，為新歌《橙海》拍攝特別版MV。

為了拍攝《橙海》的特別版MV，Supper Moment日前專程去到富有香港特色的啟業邨籃球場取景。期間，Supper Moment跟多名特奧運動員比試籃球和地板曲棍球（特奧獨有項目），鏡頭前大汗疊細汗玩得投入，四子鏡頭後亦跟一班特奧運動員打成一片，更不時請教運動員地板曲棍球的秘訣，面對運動員索簽名及合照，四子也無任歡迎。

初次體驗地板曲棍球的Supper Moment膽粗粗挑戰特奧運動員，任憑四人如何落力，最終仍是難逃大敗，Supper Moment直言輸得心服口服，還自嘲說：「個天安排得好啱，我哋都係做番音樂好喇！佢哋實在太犀利，有好多戰術，好有默契，一個眼神就知道點走位，我哋都有嘗試努力爭取入球，但真係好困難，可能我哋天份都放喺音樂上。」不過，Supper Moment強調贏輸並非重要，最緊要是享受過程：「其實我哋自己都有隊籃球隊打比賽，戰績係兩勝，七、八場負，但我哋都冇唔開心。」

不少香港人只忙著工作而令壓力爆煲，運動固然是絕佳減壓方法，但Supper Moment原來自有一套紓壓良方。四人認為最重要是能將心扉打開及感受生活：「我哋只要將事情睇輕啲好！最重要係活在當下，多啲欣賞身邊嘅一事一物，而瞓覺同玩音樂對我哋嚟講都係減壓嘅一種。交功課我哋就會覺得有壓力，但交歌，我哋唔會，喺台上玩音樂，我哋都盡情享受。」