編劇莊梅岩拒為《短暫的婚姻》寫電影版劇本:我做唔到一雞幾味!

撰文:
最後更新日期:

由莊梅岩(Cancer)編劇、電影《點五步》導演陳志發監製和執導、陳奕迅主演的5集短篇港劇《短暫的婚姻》,去年10月初在ViuTV首播後,隨即獲得不俗迴響,更掀起追看潮,觀眾大讚對白貼地、散發日常生活的真實氣息之餘又充滿睿智,沒有大台自製劇那些常見的「膠味」外,光影、空間、佈景、服飾、化妝、演員和鏡頭走位等場面調度亦深得他們歡心,那些從屏幕呈現出來的畫面,綴以陳奕迅主唱的《誰來剪月光》和《披風》等歌曲,散發港劇界難得一見的脫俗氣息,簡約而華美,盡顯細緻淡雅,跟《降魔的》並稱去年兩大最佳本地劇集。

事隔一年,有單位決定將同一劇目搬上舞台,舞台劇版鐵定於2019年1月公演,首演日期和場次多寡有待10月10日舉行的記者會上公布,惟其facebook官方專頁由本周一(27/8)開始以「擠牙膏式策略」逐日揭曉演員陣容,包括:男主角由潘燦良擔綱演出,他將會扮演劇中由陳奕迅飾演的Galen;劇中女主角、即蔡思韵扮演的Malena,去到舞台上就會變成由資深劇場演員禤思敏負責演出;Malena的閨密好友Ceclilia,劇集版是蔡潔,在劇場版則是「蝦頭」楊詩敏;至於Malena的丈夫Terry,劇集版由郭偉亮(Eric Kwok)飾演,今早(30/8)早上10時,主辦單位終於在facebook官方專頁宣布,Terry一角在舞台劇裏將由林海峰負責演出,連同一早已公開、今勻將會再次擔任編劇、曾5度奪得「香港舞台劇獎」最佳劇本獎的莊梅岩,這個5人組合,令《短暫的婚姻》迅即成為本地劇迷「撲飛」意欲最高的2019年舞台劇。

曾五度獲得「香港舞台劇獎」最佳劇本獎的著名劇作家莊梅岩,日前接受電話訪問時,詳細講解何以在《短暫的婚姻》電視版首播後一年會出現舞台劇版,原來當初她是先寫有寫舞台劇劇本的想法,寫了幾場後因雨傘運動而沒有心機再寫,只好擱在一邊「封塵」,兩年後機緣巧合下才將故事續寫下去,變成大家之後看到的電視版劇本。(資料圖片)

舞台劇本已開了頭 封塵數年後輾轉變成劇集

問到是否因為劇集出乎意料地大受歡迎,才食髓知味推出舞台劇版,作為著名香港舞台劇作家的莊梅岩接受電話訪問時,分享一段鮮為人知、有關創作《短暫的婚姻》劇本時的故事。4年前,莊梅岩開始撰寫《短》的劇本,卻因心慌意亂,難以落筆。「可能有啲人唔知道,我係先寫咗幾場舞台劇Scene(場景),但之後雨傘運動爆發,呢樣嗰樣,嗰陣時嘅社會氣氛唔係幾好,我覺得,唉,寫埋呢啲情情塔塔嘢做乜鬼呀?!咁我就擺低咗。」

莊梅岩說,往後一段時間,她去了做其他創作,而那份未完成的《短暫》劇本,只好擱在家中一隅,直至2016年ViuTV向她求劇本,打正旗號的問,是否有興趣為陳奕迅的音樂電影寫劇本時,她霎時想起這份「封塵」兩年的手稿,「雖然我唔係Eason嘅Fans,但向來都好鍾意,睇過佢嘅《十二夜》(2000)同《金雞》(2002)等仲有好多套,我覺得佢演得好好,係個好好嘅演員,所以當ViuTV咁樣講,我係有興趣嘅,但因為時間關係,我就將《短》嘅故事大綱畀佢哋睇,如果佢哋係有興趣,我就繼續Develop落去,如果冇興趣,我都未必可以咁短時間內,由頭構思另一個好啱佢哋嘅故事,結果好好彩……」

經過一段時間續寫劇本、開鏡拍攝、後期製作,就成為大家去年看到的劇集版《短暫的婚姻》。

去年10月,那邊廂要追看《降魔的》,另邊廂要追看《短暫的婚姻》,觀眾大讚莊梅岩創作的對白貼地、散發日常生活的真實氣息之餘又充滿睿智,帶出Galen(陳奕迅)和Malena(蔡思韵)之間那種不能宣之於口的感情,亦令人甚有共鳴,愈看愈心痛;而陳志發執導的畫面,散發港劇界難得一見的脫俗氣息,簡約而華美,盡顯細緻淡雅,水準之佳,教人欣喜。(ViuTV截圖)

莊梅岩開出三大條件 將劇本「易手」予朱仲銘

兜兜轉轉,一年後,莊梅岩又再動筆,為同一個故事書寫第二個版本,將電視版劇本「還原」為舞台劇本,曾執導詹瑞文、伍詠薇、林嘉華、向海嵐主演的《嬉春酒店》(2016)、今次《短》的舞台劇監製朱仲銘(James)是始作俑者。「本來香港都有好幾個藝團可以合作,但咁啱嗰段時間,我哋個Producer朱仲銘搵我,問我會唔會有邊啲劇本可以畀佢Present,因為當時電視劇已經做咗,又有少少Noise,我就同佢講,我覺得《短暫的婚姻》呢個劇本幾啱Commercially去Produce(以商業模式製作)。」

就在劇本「易手」予朱仲銘「賣蹺」前,莊梅岩開出三大條件,務必要對方履行承諾:整個創作班底都是劇場工作者、4個主要演員,其中3位必須是舞台劇演員,「對於商業製作嚟講,(主辦單位)佢哋係會想搵明星,咁我覺得,4個演員入面,有3個做開舞台劇,第4個係可以Draw到飛(有號召力,更加叫座)嘅Artist,我係好明白,但呢個Artist都一定要係啱呢個角色,同埋係做過舞台劇,我同監製講,一定要咁樣,我先放心將個劇本交畀佢去Produce。」

潘燦良飾演Galen。(資料圖片/《短暫的婚姻》舞台劇facebook專頁)

禤思敏飾演Malena。(《短暫的婚姻》舞台劇facebook專頁/網上圖片)

蝦頭飾演Cecilia。(《短暫的婚姻》舞台劇facebook專頁/資料圖片)

結局你我早已知,無需再賣關子,《短暫的婚姻》舞台劇落實去馬!莊梅岩直言現時的創作班底皆為劇場界精英,令她甚為期待,當中包括導演方俊杰,她倆在今年勇奪「第27屆香港舞台劇獎」最佳製作等多個大獎、9月初重演的音樂劇《奮青樂與路》經已合作過,「有睇開舞台劇嘅人,都應該知道方俊杰,雖然佢比較年青,但佢已經係好Established同埋Experienced,另外負責舞台設計呀,燈光設計呀,都係一啲好出色嘅Designers同埋Artists,所以我係好開心!」

演員陣容方面,她亦相當滿意,尤其是外界焦點、飾演Malena丈夫Terry的林海峰。對於阿Jan今次參演,莊梅岩拋出三個字 ── 「好適合」!她解釋,初期和監製討論人選的時候,難免會提議誰和誰去演Galen或者Malena,聽過一堆明星的大名後,她搖頭,「冇乜人令我覺得,嘩,好喎,或者係我好信賴佢嘅演技,直至監製提出林海峰,我就覺得佢好啱演Terry呢個角色。」最終這個角色如願落在阿Jan身上。

林海峰飾演Terry。(資料圖片/《短暫的婚姻》舞台劇facebook專頁)

如果有看過電視劇版本的讀者都會記得,Terry(郭偉亮)在故事裏背着妻子Malena偷食,結果遭鄰居Galen發現。這一幕,Terry指責情婦刻意將自己的私家車停泊在他家附近。「聽住,Day 1已經同你講,我好愛我老婆,如果你諗住玩嘢,我哋依家就完咗佢,好嚟好去呀!」(ViuTV截圖)

林海峰極適合演Terry 莊點評:醒目得來又有少少大男人

如果有看過電視劇版本的讀者都會記得,Terry在故事裏背着妻子Malena偷食,結果遭鄰居Galen發現。莊梅岩認為,這個角色有很多特質,都跟她所理解的林海峰有很多相似之處,「我諗係嗰種醒目,因為呢個角色係事務律師,係比較Smart,口才好了得,好精靈、好寸嘴,有少少大男人,但係好愛家庭,阿Jan有畀到呢個感覺我。」她坦言,私底下跟林海峰不是朋友,不太清楚他的個性怎樣,亦沒有追看娛樂新聞的習慣,只能相信聽見的和看見的,「之前睇過佢同黃秋生做《搞大電影》(2017),我覺得非常之好,無緣睇到《笑の大学》(《笑之大學》,三谷幸喜劇作,2014),但我聽講佢喺呢套劇入面又係做得好好,加上我又從啲朋友口中,知道佢係一個好容易合作,又好尊重舞台嘅人,咁我就好放心,我唔係純粹因為佢嘅名氣而揀佢。」如今4位主角「齊腳」,而且都是由那麼有份量的舞台劇演員和藝人擔綱,莊梅岩自嘲:「就算套劇真係做得唔好,都一定係個劇本唔掂囉!」所以她直言要加把勁,必定要將劇本修改得更臻完美。

莊梅岩承認,一早已聯絡陳奕迅,看看能否邀得電視版原班人馬參演舞台劇版。「有話畀佢知,我哋諗住做呢個舞台劇,唔知佢會唔會有時間,如果當時佢話好有興趣做,我哋就好大可能會原班人馬咁去做,我相信都係會好Interesting,但佢都係好忙,所以佢個時間唔係好啱。」正因為不成事,莊梅岩才決定要重新再來,為舞台劇版另組新演員班底。(viu.tv)

媒介轉變不能搬字過紙 「還原」劇場版滿障礙 

莊梅岩說,現時劇本已寫了第一稿,她直言不滿意,趕住交稿只是權宜之計,直至圍讀、排練開始前的一段時間,她已有心理準備要不停修改劇本和對白,「而家出咗First Draft,係畀工作人員先開始做Design同Casting,因為我哋仲有Galen個仔嘅角色需要Cast一個小演員,所以就算唔係好滿意,都要出咗呢個Draft。」經過多年試煉、實戰,劇場這個媒介對於莊氏而言絕對手到拿來,然而今次這條寫劇本「邁向完美之路」並不好走,因為有太多劇集版成功之後帶來的無形包袱,為其創作構成很多障礙,比如故事走向,「因為已經做咗一次電視版,無論係有意定無意,我都想脫離原本嗰個故事軌跡,但整來整去,我都係覺得仲未夠好,好似我想行另一條路(故事發展),但仲未行得最好。」

又比如是否要符合觀眾期望狂加「金句」,「當時電視版出街,啲觀眾好容易就會話,啊,呢句對白好好呀,首先,嗰啲唔係咩『金句』,我哋做編劇嘅,只係寫人物嘅語言啫,『金』唔『金』係人哋Quote出嚟,觀眾有觀眾嘅睇法好正常,但我意思係話,呢樣嘢都係會成為創作人嘅包袱,因為人哋(入場)會預期有呢啲金句,但由電視去到劇場,個媒介已經唔同,我哋係會用另一個Way(方式)去講故事,我哋就會諗,究竟觀眾會唔會好大期望,覺得要喺舞台劇裏面搵返我哋之前做嘅一啲好嘅嘢呢?!」

林海峰將於《短暫的婚姻》舞台劇飾演出軌丈夫Terry,然而這並非他首次「偷食」,早於《那一天我們會飛》(2015),他飾演的彭盛華便背着太太余鳳芝(楊千嬅)在外面有另一個女人。(網上圖片)

電視版Galen成重心 劇場版4主角戲份平均

莊梅岩說,經過幾個月的「折磨」和「掙扎」後,總算在已寫好的第一稿中放低了部份包袱,未來她最需要處理的,是理順第一稿與電視版「原著」的優與缺,將那些原本在電視版出現、卻在第一稿刻意避開的好點子重新放進第二稿之中,「電視版有啲好嘅地方,我之前寫First Draft嘅時候特登避開,但寫完之後又會覺得,唔使避呀,可以喺舞台劇版本當中呈現出嚟。」不過角色的戲份比重,明年公演的舞台劇版,必然會跟電視版不同;去年在ViuTV首播的電視版,重點明顯放在鰥夫(鰥音關,即陳奕迅飾演的Galen)身上,「呢個設計,明顯係為咗配合Eason個音樂特輯,但去到舞台劇版本,故事框架一樣,亦都係嗰啲人物,潘燦良個角色係死咗老婆,禤思敏同林海峰係一Pair,蝦頭就係蔡潔嗰個角色,但故事嘅走向好唔同,人物關係會複雜少少,4個人嘅戲份都幾平均,但就唔會去英國囉!」為何不邀請陳奕迅踏上舞台再演一次?

答案:時間不合。莊梅岩這樣說:「我哋事前都有同Eason打招呼,話畀佢知,我哋諗住做呢個舞台劇,唔知佢會唔會有時間,如果當時佢話好有興趣做,我哋就好大可能會原班人馬咁去做,我相信都係會好Interesting,但佢都係好忙,所以佢個時間唔係好啱,我自己作為一個創作人,當呢件事係有一隻『腳』唔得呢,對我嚟講,你畀我Free,重新嚟過,係會仲好啲,所以之後我哋有同佢講咗,舞台劇版係會以而家呢個陣容咁去。」既然是「全新」,除了剛才說過,要保留電視版本的好點子,放在舞台劇版本外,她已決定放棄電視版裏的角色設計,盡量不去想陳奕迅和蔡思韵扮演的Galen和Malena,「你會見到,其實阿Mi(禤思敏)的角色年紀比較大,唔係Ceci(蔡思韵)咁Young,新版本嘅劇本畀我嘅感覺係好唔同。」

游大東其他文章:

【奪命証人.專訪】謝君豪入戲要實在 去半島行樓梯國王「上身」

【Plan B.專訪】入行8年事業無起色 陳炳銓:絕對係我能力未夠

【Plan B】陳啟泰10年後再拍劇 脫眼鏡演黑幫:呢個仲似我真人!

【非分熟女】台灣視帝吳慷仁「融入家中」 演港式茶記廚師學拋鑊

由鄭秀文、佟大為和蔡卓妍合演,預計今年11月上映的電影《聖荷西謀殺案》,故事改編自莊梅岩2009年的同名劇作,此作獲得第19屆香港舞台劇獎(2010)最佳劇本等四個獎項,然後電影版劇本並非出自其手筆。「《聖荷西》電影版嘅劇本本來都係我寫,但寫寫下發覺唔係太合適,所以由其他人接手(翁子光)。」(資料圖片)

2016年上映的《暗色天堂》,由袁劍偉執導,張學友、林嘉欣主演,改編自莊梅岩的《法吻》舞台劇劇本,原來袁導一直希望莊氏參與劇本修改的工作,卻遭她一口拒絕。(網上圖片)

無意為《短》寫電影版劇本:總之我唔希望Repeat!

最後得向莊梅岩問一個假設問題:既然她說《短暫的婚姻》是一個頗為適合以商業模式營運的劇本,又假設將來舞台劇版票房大賣,會不會像當年杜國威的《我和春天有個約會》那樣開拍電影版?莊梅岩直截的說,就算真的有也這個想法,也絕不會由她本人執行,「其實今次整呢個舞台劇版,我已經好知道自己其實唔係一個可以一雞幾味嘅人。我明嘅,一定有人話,都已經有第一個版本,咁樣咁樣變咪得囉?!喺腦入面,我知道我係可以咁樣做,但總之我唔希望Repeat囉,今次好在係我有舞台劇版嘅概念在先,跟住先寫電視版,所以返嚟做舞台劇版,我個心理障礙唔係好大,但如果要我再寫一個電影版,我諗真係要有一個好大嘅理由,我先會做,如果你咁問我,我就唔Prefer做喇。」

翻查資料,莊梅岩確實講得出做得到,由她創作的兩套舞台劇劇本 ── 《法吻》(2005)以及《聖荷西謀殺案》(2009),近年都開拍電影版(前者由袁劍偉執導,張學友、林嘉欣主演,以《暗色天堂》的戲名上映,後者則由潘源良執導,鄭秀文、佟大為、蔡卓妍主演),然而兩套劇本都並非出自莊梅岩之手,「《聖荷西》電影版嘅劇本本來都係我寫,但寫寫下發覺唔係太合適,所以由其他人接手(翁子光);至於《暗色天堂》,導演係好尊重原創,佢係有叫我去改,但我拒絕咗,我話我真係唔識改,我話:你買咗個版權,你鍾意點改都可以,我放手㗎喇,因為落手落腳拍嘅係你,不如你按自己意思去做係最好,正如我去改人哋嘅嘢,如果成日都有個人喺度阿吱阿咗,我都會覺得好煩。」總結莊梅岩的想法,她不想重覆自己的創作,假若一些獲得她信賴的有志之士打算改編她的原著,花錢買下版權即可,「我買個版權畀佢,佢自己做,咁我就可以投入另外一啲新嘅創作,我比較鍾意咁。」

去年10月,ViuTV曾在周末深夜播出《短暫的婚姻》118分鐘「一氣呵成版」,但莊梅岩認為這跟真正的電影是兩回事。「在商言商,連續兩個鐘咁樣播出嚟係冇問題嘅,但如果你叫呢個做電影,我就覺得唔好,因為電影嗰個Plot(故事結構)嘅去法係唔同,我而家(電視版)咁樣寫,係因為我知道十幾分鐘有個Break,半個鐘係一集,嗰個Hook(鉤子,即每集為吸引觀眾追看下去的停頓位)係唔同㗎嘛,如果要寫電影,整個結構就要由頭再諗過!」(資料圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。