【延禧攻略】鄧萃雯原本有份做皇太后 最終因片酬關係告吹？
撰文：鄺鈺瑩
出版：更新：
內地劇同大台劇都唔接，鄧萃雯偏偏選擇了ViuTV的《婚內情》，日前她在記者會上表示對婚外情呢個題材感興趣。（資料圖片）
清宮劇《延禧攻略》令劇中一眾演員名利雙收，隨著續集已落實開拍，今日就有消息指原來劇中皇太后一角，原意係由鄧萃雯演出，但由於片酬關係，所以最後由內地老戲骨宋春麗頂上，皇太后於劇中雖然戲分唔算多，但絕對係能影響大局的一位，加上皇太后老謀深算，單係留下乾隆同袁春望身世懸念時的模樣，已令唔少劇迷驚嘆。
皇太后一角由內地老戲骨宋春麗飾演。
講到推劇，鄧萃雯其實已非首次，當年《後宮甄嬛傳》華妃一角原意屬她，奈何因與《新還珠格格》撞期，所以佢唯有忍痛放棄，《甄嬛傳》後來爆紅中港台，眼見蔡少芬憑該劇成功打入內地市場之餘更水漲船高，鄧萃雯都話過「深感後悔」，更表示如果將會遇上好角色同劇本的話一定會去演……如今，又一次證明人類總係犯同樣的錯誤。
鄧萃雯當年在《金枝欲孽》做如妃。（網上圖片）
對於好劇本同好角色的定義，其實單係《延禧》製作人于正呢個金漆招牌就已經係保證，再加上製作費高達3億人民幣，雖然有指演員片酬只佔8%，但就連佘詩曼都肯落搭，照咁睇，真係沒有不接的理由。《延禧》去年6月開拍，而鄧萃雯去年就只有《繁星四月》一劇在身，而且拍攝時間已經係2016年，應理沒有撞期之說，但如果真係如傳聞「片酬關係」而推卻，鄧萃雯今次都真係幾錯。而除了《延禧》外，鄧萃雯今年亦推卻了大台新劇《多功能老婆》並接下ViuTV新劇《婚內情》，原因好簡單：「手到拿來嘅角色我唔會再去演」，暗示《多功能老婆》劇本未能符合佢過戲癮的指標……嗱！《多功能老婆》仍在拍攝中，收視有幾多言之尚早，但睇睇《延禧》於內地有幾咁火熱，鄧萃雯會否已經揼裂了心口？日前佢就喺微博轉載一篇關於《金枝欲孽》的文章，並表示：「拍過2004年的金枝欲孽，很難再拍其他的宮鬥片，如果不明白很難理解，自己去看看吧！」
係未即係表示唔會再接任何的宮鬥劇？