Cheronna清晨上大帽山拍MV遇牛群 自嘲:見到我膚色以為我係牛!

撰文:
最後更新日期:

Super Girls成員吳嘉熙(Cheronna)剛剛推出「單飛」後第二首歌曲《你的你》,歌曲主要講述現今社會上有人喜歡用自己的一套價值觀去批評別人的外表、身形、個性、性取向等,希望藉歌曲鼓勵那些被現今社會扭曲價值觀所影響的人,如何可以活出真正屬於自己的快樂人生。

Cheronna日前清晨時份到達大帽山,為新歌拍攝MV。拍攝當日,她與團隊摸黑走上近山頂位置等待日出,但天氣不似預期,拍了幾個鏡頭突然下起大雨,一行人被迫撤離避雨。正當Cheronna擔心拍攝要改期時,天色慢慢轉好,更有雨後陽光,難怪Cheronna笑言情境跟新歌一樣,經歷過低潮後都會出現曙光。

今次在山上除了可欣賞靚景外,更首次近距離見到牛群,Cheronna笑言︰「今日見到好多牛喺身邊好自由咁行嚟行去,啲牛成日對住我大叫,我懷疑佢哋見到我件衫同膚色,以為我係一隻牛,不過大叫完發現我無回覆,先知我係一個人。」

提到新歌講到大家在日常中,經常被負面標籤,Cheronna直言自己也被標籤過︰「好多人都標籤我係肥,當然會有難受嘅時候啦,到依家我仲擺脫緊呢樣嘢。入呢行就當然要你瘦,尤其係我身邊Super Girls成員都係高、靚、瘦,而無一樣同我有關,每一日都被人標籤我唔應該喺呢個group入面,不過我無理,我仍然係Super Girls,繼續做我自己鍾意做嘅嘢。」Cheronna坦言曾因此心情低落,直到當知道身邊有人幫助自己,就知道身邊人有多重要。故今次推出這歌便希望將正能量帶給別人,同時讓人知道他們不是在獨自面對和承受。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。