【專訪】曹震豪身兼六職唔覺辛苦：做酒吧歌手都可以有滿足感

導演麥曦茵早年成立了Dumb Youth創作單位，旗下現擁有9名藝人、歌手，當中包括曹震豪（Wallis）。或許大家對曹震豪的印象，只得「江嘉敏緋聞男友」，但其實Wallis出道快13年……為了歌手這身份，曹震豪曾經身兼廚房、賣時裝、舞台助理、酒吧駐唱等六份工，所謂手停口停，更何況他要養家，去年只放了兩日假。香港人，真係好喜歡「返工」。

有睇開高登或連登討論區的話，對於「Hi auntie」一詞相信並不會感到陌生，曹震豪的新歌《Hi Boss》也是由此詞引伸要成的，是否對老闆麥曦茵有所不滿呢？他說：「首歌其實係佢提議我寫，自己當時都諗係未得罪咗佢或者佢比個氹我踩呢。」其實麥曦茵的出發點，單純是想為打工仔出氣。歌詞中提及的「扮勁忙係要召喚我 鬧我承受不起你賺少咗」絕對不會發生在麥曦茵與曹震豪身上，因為對曹震豪而言，麥曦茵的身份已非老闆咁簡單。「佢係好好的工作伙伴，經幫提點我要在自己的崗位上有更多的供獻、做一個好嘅人。」
 

曹震豪早年與舊唱片公司解約，欠下一身違約金，麥曦茵雖然頂著「義氣」兩字簽下曹震豪，但唔係簽咗就等如有收入，為了生活，曹震豪身兼亦職，既是唱片歌手又或酒吧歌手，問到對這樣的身份有否感到迷惑，他說：「入行前就已經做酒吧歌手，所以好難去區分，同埋無論舞台有幾、工作性質是什麼，我都會好享受。酒吧唱歌時都要照顧客人，所以會唱一啲自己唔叻、或者不停咁重覆唱嘅歌，久而久之就當了是練歌，客人年齡層好廣，我要點樣同時做一個橋樑令大家都娛樂到呢？呢個都係一門學問。」在學習照顧客人、練歌喉之餘，作為酒吧歌手，曹震豪也是有滿足感的，他說客人基本上不會因為想聽他唱歌而去酒吧，所以當客人因他的歌聲而放下手上的骰盅，給予掌聲或留意，已夠他開心半天。
 

曹震豪現時最主要的收入來源是幫廣告配樂，有點做咗都唔會有人知的感覺，但他亦樂於做。「因為都係一份工，同埋又同音樂有關」雖說酒吧歌手做又得，唔做又唔會交唔到租，但曹震豪沒有打算放棄，畢竟與客人／老闆有感情，身兼六份工，連假都無得放，辛苦嗎？「爸爸走咗嗰陣辛苦，細佬畢業未有收入、媽媽沒有工作又有情緒病，我要負擔晒所有支出，那時事業剛起步沒有任何儲蓄，後來連演藝事業都停埋，心理上負擔好大。」辛苦還辛苦，但曹震豪卻甚少問「點解會係我」，他說如果沒有過去的經歷，如今未必會珍惜所擁有的。「原來有得唱歌係好幸福，所以唔會去諗點解會係我，同埋對身外物的追求，並唔會好似以前咁心急 。」

場地提供 : Superstar Live Music Lounge