【曬B狂魔】陳柏宇新招玩囡囡Abigail　符曉薇：好在個女唔理佢

不時聽到女士投訴，另一半永遠好似大細路一樣，所有事物都好似係玩具，經常做出令人反白眼嘅行為，最近反白眼反得最多嗰個，可能係陳柏宇老婆符曉薇（Leanne）。自囡囡Abigail上月出世後，Jason眼中只剩下前世情人，瘋狂影低囡囡搞鬼表情同大家分享，又不時整蠱個女，呢日Leanne忍唔住要爆啦﹗

Abigail依家先得13日大，Jason已經喺自己IG，以及佢幫囡囡開嘅IG，上載近50個POSTS，話：「Abi大個女喇，自己識著衫喇！」上載幾張連環圖睇落真係幾似囡囡自己著衫，不過，走光露點啦陳爸爸，人地女仔嚟架﹗連Leanne都頂唔順，上載Jason錫女相留言話：「你可唔可以唔好成日痴住你個女塊面？佢敏感你就知死﹗」

Leanne 仲喺IG Story大爆Jason最新力作，短片中Jason脫去上衣半裸抱住Abigail，然後將囡囡個頭放近自己乳頭，最終Abigail用手仔推開咗，Leanne無眼睇表示：「條粉腸俾自己乳頭個女，好彩個女唔理佢。」其實唔少媽媽網友見到呢條片都覺得相當熟悉，原來唔少爸爸都試過「扮餵奶」，雖然就餵唔飽BB，不過俾佢地感受下被咬受損之苦，其實，都幾溫馨呀。