香港地依家3、40歲先結婚真係大有人在，Zoey岑潔儀算少數比較早婚嘅代表。25歲下嫁馬來西亞富商老公Dixon，今年31歲剛剛已經成為兩子之母。Zoey接受《香港01》訪問時仍然難掩興奮心情：「最開心係哥哥好錫細佬，BB喊我地無特別理佢仲會嬲，嬲我地做咩細佬喊都唔抱佢哈哈哈。」

Zoey最近剖腹誕下7磅細仔，老公有陪入產房兼剪臍帶，Zoey話過程既輕鬆又搞笑：「生嗰陣無喊因為有第一胎經驗，不過我打完麻醉針一見到老公就喊，因為覺得好感動，又可以為老公添多個丁，覺得自己都幾利害。囝囝出世時就喊唔出啦因為實在太搞笑，因為佢一出世醫生遞過嚟俾我望，阿仔就請我「飲茶」哈哈哈，成個過程都好輕鬆好開心。」

兩個小朋友有個伴一齊成長當然好，但做父母最擔心就係佢地會爭寵呷醋，好在Zoey就唔使面對呢啲煩惱：「哥哥見到細佬好開心好鍾意呀，係咁要攬同錫錫細佬，又覺得好好奇，點解喺媽咪肚入面走咗個BB出嚟，BB喊我地無特別理哥哥又會嬲，嬲我地做咩細佬喊都唔抱佢哈哈哈。」至於嚟緊仲想唔想生多個小公主嗲下自己呢，Zoey就話：「自己當然都想追多個女啦，但係又覺得生容易湊好難，所以都係封肚啦。以後都喺屋企做皇后，成屋男人圍住鍚自己都唔錯呀。」