黃心美與表哥失散20年 靠杜汶澤24小時內尋回親人：無以回報﹗
撰文：洪曉璇
出版：更新：
世界很大，有時人同人之間關係斷咗，突然想起對方想聯繫上，都唔係一件容易嘅事。黃心美呢日喺網上留下長文，原來佢同一位表哥已經失聯二十年，每次黃爸爸提起都好希望搵返呢個外甥。估唔到峰迴路轉，最終竟然係杜汶澤出手，成功喺24小時內搵返表哥﹗
黃心美同爸爸感情相當好，知道佢一直想搵返失散多年嘅外甥，即使機會渺茫都盡力去試。（黃心美IG）
心美喺facebook以「尋找表哥的故事」為題娓娓道來：「我Daddy今年就嚟70歲，一直好想搵番失去聯絡咗廿幾年嘅表哥，daddy成日都會喺我面前提起表哥，話好想搵到佢，尋晚又講起，食完飯坐的士送佢返屋企嗰陣臨落車佢拋下一句’你試吓用你嘅connection睇吓可唔可以幫我搵到表哥啦。」
黃心美於網上分享呢個尋找表哥的故事。（黃心美FACEBOOK）
人海茫茫要搵一個人真係唔容易，心美只能喺個人fb page同ig story出post，貴人開始出現啦：「強尼睇到就同我講杜汶澤咪讀男拔架囉。我同阿澤雖然相識但係不至於熟到我夠膽滾搞佢，但係隔咗冇耐，阿澤竟然喺fb回覆我話幫我問緊，亦真係問到表哥嘅舊同學，原來佢哋多年嚟都有嘗試搵佢， 再隔咗冇耐阿澤send咗個表哥喺02年讀緊Harvard law school 嗰陣同同學通電郵嘅email address俾我，嗰刻我已經喊咗出嚟，但係當我寫完篇論文send出去之後發覺原來個email address已經唔存在嘞。」
男拔舊生杜汶澤發動同學間嘅力量，成功幫心美搵到表哥，令黃家上下都非常感激。（黃心美IG）
雖然一個希望落空，但原來阿澤一直默默做嘢，好快又為心美帶來好消息：「一起身就見阿澤個message話DBS嘅師兄喺LinkedIn搵到佢，表哥嘅回覆令我流咗好多開心感動嘅眼涙。呢幾年我每次去拜姑姐都會叫佢保佑我幫daddy搵番表哥，依家終於搵到嘞。衷心多謝你杜汶澤先生，由尋晚出post到依家唔夠廿四個鐘幫咗我一個我無以回報嘅大忙。已經同表哥交換咗電話，我保證以後唔會再同佢失去聯絡。」
黃心美最終與表哥聯絡上，相信係黃爸爸最好嘅聖誕禮物。（黃心美IG）