華姐佳麗要苦練地球最難語言? Ben Sir:學廣東話有三大難關

撰文:
最後更新日期:

《2019國際中華小姐競選》將於3月2日於將軍澳電視廣播城舉行,日前19位佳麗便首次會見傳媒。同日,前大學高級講師兼節目主持人歐陽偉豪(Ben Sir)便向一班候選華姐教授廣東話知識,當中更鬧出不少笑話。無綫(TVB)的網上平台big big channel日前便上載相關片段,當中來自大溪地的17號楊美麗便將自己的成長地讀成「大Kai地」,非常搞笑。

今日(23/2),big big channel又上載多一條片段,片中的Ben Sir便教佳麗廣東話六調,以「三碗細牛腩麵」一句去測試她們,當中有不少人將句子讀成「三碗犀(西)牛腩麵」,非常搞笑。之後,Ben Sir又叫她們讀齊「一至十」的六調,當她們讀到「七」和「九」時,便讀出兩大香港常用粗口字,不過製作組便用後期「咇」走了。

點擊下圖觀看一班準華姐如何被廣東話玩殘:

+7
+6
+5

廣東話有三大Boss 九聲六調玩殘初學者

Ben Sir接受《香港01》訪問時便透露之後都會有佳麗讀急口令的內容,一樣趣味盎然。問教一班準華姐廣東話是否很難,Ben Sir便指她們大部分有一定底子,不會完全不明白他教授內容:「完全唔識廣東話嘅人,主要會俾『韻尾』考起,好多人都會讀漏,例如學生個『生』(粵語拼音:saang1)字,可能會讀漏『ng』呢個韻尾。」而廣東話的獨有詞彙亦是初學廣東話人士的一大難關。

除了以上兩大「大佬」外,Ben Sir指還有一個「終極大佬」,他說:「廣東話嘅『九聲六調』對本身唔識廣東話嘅人係好難,不過唔係冇辦法。」例如,將「九聲六調」融入日常生活句子再讀出來(即上述的「三碗細牛腩麵」),讀多幾次便便會變得順暢:「不過入聲字(例如:七、八、六)同合口韻尾(例如:十),對之前聽開、講開普通話嘅人係會好難。」

Ben Sir之前在中大任教時已經非常玩得,不時在電視節目中扮鬼扮馬,他辭去教職做藝人更愈玩愈放。(電視畫面)

點擊下圖觀看多個Ben Sir趣怪造型:

+4
+3
+2

廣東話是最難語言? 三個月就可學好?

到底一個對廣東話毫無認識的人,大概要花幾多時間才能講得流利?Ben Sir答謂:「如果係接受密集式訓練,例如喺大學修讀廣東話咁,有心學的話大概三個月就可以變得流利。」需要學習廣東話的迫切性、學習者的成熟程度亦影響掌握速度:「我寫碩士論文時就搵咗一個6、7歲大嘅小朋友嚟研究,我每星期都同佢上堂教佢廣東話,佢係喺湖南長沙嚟香港,佢由初初唔敢講到講得流利,用咗10個月至一年時間。」

談到不少網友以及網上文章都指廣東話是全世界最難學的語言,Ben Sir便指這是普遍港人心中存有的迷思:「最主要係因為我哋對其他語言唔了解先有呢種諗法,其實每種語言都係咁難,每種語言都係咁易,每種語言都有佢嘅困難之處,好似日文就係佢嘅文法,普通話就係中間有介音『i』,法文就係名詞有性別,一支筆竟然係男仔唔係女仔。」

博士級的Ben Sir現時是全職藝人,有不少廣告的他曾在訪問中坦言現時收入不似以往穩定。(資料圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。