【開心速遞】「龔水線」終成真正CP 　龔燁情深回應向熊若水表白

無綫處境劇《愛·回家之開心速遞》入面有多對CP都好受觀眾同網民的喜愛，而其中一對就是龔燁 (張景淳飾) 與熊尚水 (呂慧儀飾) 這一對CP。在這麼多集以來，這條「龔水線」兩位男女主角由最初的歡喜冤家，到兩人互有好感後來更暗生情素，之後當大家期待他們可以有進一步發展，等睇若水被龔燁的真情打動之時，張景淳卻突然離開劇組，令到粉絲們都非常愕然同心碎。

網民更一度於討論區發起「龔燁行動」來召喚張景淳重返劇組，繼續與呂慧儀的感情線。而他最終亦於去年7月宣布回歸劇組，這對龔水CP得以重現大家眼前，再續前緣。隨住張景淳的歸來，龔水線也就發展得愈來愈烈，劇中龔燁同若水經常大玩曖味，鬥氣互寸之餘不時又派下糖，令人看得甜在心頭，觀眾同網民就更加希望兩人可以正式成為情侶，且睇到好心急。

昨晚適逢3月14日的白色情人節，劇情終於有重大的進展，龔水線真真正正變成龔水戀喇！ 兩人在夜幕月色之下於噴水池邊相會，氣氛相當浪漫，若水向龔燁表白心中感受，講到明可以給對方一個機會來當她的男朋友，龔燁沈默片刻之後即以突襲式情深的一吻來回應若水，更表示：「三個字，我願意」令若水冧爆。兩人於今集甜蜜派糖真係睇到人隨時患上糖尿病㗎。而今集亦是呂慧儀宣布離婚後，首個若水的感情戲單元，粉絲都看得份外肉緊，也心痛她在戲裡如此甜蜜，現實生活中卻經歷婚變。

張景淳與呂慧儀於昨晚一集播出之後，都分別有在他們的Ig出post，除了多謝大家的支持之外，呂慧儀還放了一條短片，交代返若水同曹總 (劉一飛飾) 的關係。相信大家一定記得曹總同若水都曾經有過一段「霧水情緣」，曹總曾經心儀若水並追求過她，而若水亦覺得曹總是個好男人，曾考慮過接受對方。如今龔水戀正式展開，也代表着曹總失戀了，真係有人歡笑有人愁。呂慧儀的IG短片入面就影住若水行行下見到曹總出現，嚇了一跳，曹總一片痴心加驚喜咁同若水講：「我終於等到你喇！」但若水就表示：「你有無睇尋晚嗰集㗎？你唔好再等我喇，曹總。我覺得你應該去my TV Super度loop多幾次，清醒下，bye。」之後曹總唯有一臉落寞地跟若水說bye，好慘慘豬㗎，但成條片就好好笑。

張景淳接受《香港01》電話訪問時透露，當日呢場咁sweet的親吻戲拍了兩take就搞掂了，而該劇的監製更是親自操刀拍攝，有好高要求，就連細節位都好認真。而他當時一心就是想做足監製的要求，將這場戲拍到最好。問到龔水戀稍後會繼續派糖，抑或是會有情敵介入，張景淳說：「暫時就未見到會有情敵出現嘅安排，大家可以放心。」至於作為龔燁，他又怎睇曹總呢個情敵呢？他說：「雖然曹總有錢，但真正愛一個人並唔會睇呢樣嘢，龔燁對若水都好有信心，而且若水每次見到曹總都係好驚嘅，所以我唔擔心。不過曹總係一個好有勢力嘅人，同接龍集團有生意往來，若水基於工作關係難免要應酬下佢。」

逐格睇熊若水向龔燁表白

曹總等熊若水返工