以前藝人拍拖結婚會怕粉絲反感收收埋埋，但時代改變啦，用情專一嘅好男人好女友更會圈粉無數。韓國男團成員通常唔到結婚都唔會公開戀情，Click-B嘅金相赫4月7號將會同圈外女友宋多藝拉埋天窗，佢喺五星期前以手寫信宣佈婚訊後，就一改以往低調作風不停放閃，仲令網友注意到佢未婚妻相當靚女添﹗

現年35歲嘅金相赫自99年起以男團Click-B成員活躍於韓國娛樂圈，早前佢喺IG上載手寫信宣佈將與女友宋多藝結婚，並亮相MBC綜藝節目《黃金漁場Radio Star》分享拍拖點滴。但網友就將注意力放咗喺佢未婚妻身上，更登上網絡熱搜。宋多藝現年30歲係一個網絡紅人，2010年因為「cyworld臉贊」（即於社交網站cyworld出名靚女）開始於網上走紅，現主力經營網店。婚禮將於4月7日舉行，由JTBC電視台著名主播張成奎擔任主持。