陳煒現身「A記同學會」聚會　田蕊妮、陳展鵬去咗邊?

亞視藝人雖已經各散東西，但一班「A記同學會」不時都有相約聚舊。江美儀今日（12日）就喺IG上載多張照片，並發文表示：「A記同學趁中秋節，又有舊同事從台灣來港，就嚟一個大聚會啦。去到見到子博老婆Shirley 精神不錯，大家都為佢送上祝福。最諗唔到係大家為我同老鬼棠(黃樹棠)一齊預祝生日。真係好開心好感動㗎！」

照片中，除有江美儀外，仲有袁文傑、陳煒、陳啟泰、何慕詩、陳欣欣及老公何輝、蔡國威、張啟樂、林子博一家、鮑起靜、韓君婷等，十分熱鬧。但同樣係亞視出生嘅田蕊妮就未有出席，未知是否因為忙於綵排個唱，而陳展鵬亦同樣缺席。至於有份出席嘅袁文傑，亦在其IG上載合照，並發文表示：「今夜既溫馨，又燦爛」足見一班「A記同學會」嘅人感情十分深厚。