孫慧雪住址被工人姐姐利用借錢:一走咗就收追債電話同恐嚇信

撰文:
最後更新日期:

孫慧雪囝囝Riley已經兩歲幾,產後繼續工作所以有請外傭幫忙照顧小朋友。(IG:@snow711)

香港好多家庭都有請外傭,幫手打理家頭細務,又或者照顧小朋友,不過請唔請到好工人都真係睇彩數,孫慧雪都有請工人幫手湊囝囝,點知唔好彩遇著衰工人,仲搞到財務公司追債﹗

阿雪上載一封財務公司嘅追債信,大呻工人姐姐突然辭職原來係為避債(Facebook:@Snow Suen孫慧雪)

阿雪喺21號近凌晨上載一封財務公司嘅信,原來佢嘅工人姐姐瞞住佢用屋企地址借錢:「我工人姐姐突然請辭,話要返鄉下,我想請佢幫多幾日手都唔肯,喺佢一走咗之後,追債電話就打嚟,又收恐嚇信,即刻明晒點解對佢咁好都要走,我之前仲猛咁諗,係咪辛苦咗佢!佢之前話有困難,我哋仲借咗筆錢俾佢!唉!佢明知我哋屋企有小朋友都咁樣,真係好過份,可以點解決?」

唔少網友分享遇到衰工人經歷(Facebook:@Snow Suen孫慧雪)

網友建議阿雪同財仔解釋(Facebook:@Snow Suen孫慧雪)

已向財務公司解釋 仍受騷擾

由於工人突然離開,阿正呢個星期都只好親力親為湊囝囝,留言一出亦引起大批網友嘅共鳴,唔少人都分享曾經遇過衰工人。阿雪話工人喺僱傭中心搵返嚟:「仲要interview嗰陣話肯照顧小朋友,請咗返來之後話唔會照顧小朋友!」有網友建議解釋比財務公司她走了便可,但阿雪就話:「佢問我哋攞封Termination contract(中止合約證明),已經send咗,仲繼續騷擾!」對於工人姐姐忽然失蹤,阿雪就回覆《香港01》稱:「我哋開頭都諗係咩原因呢?佢一走我就收到電話搵佢追債,之前佢話屋企有啲問題,我哋都有借錢俾佢.......我聽好多朋友講佢哋經歷都係咁。」請工人真係相當頭痛嘅一件事呀。

阿雪話呢個星期都要自己湊仔,但可以多啲親子時間都係好事。(IG@snow711)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。