許廷鏗屋企勁傳統　要着老西去拜年：着到好似做保險咁！

許廷鏗（Alfred）日前應香港開電視《娛樂頭條E-News Headline》主持馬梓軒邀請，炮製潮州蝦棗！為食的Alfred笑言蝦棗是過年必食：「我姑媽每年農曆新年都會整，咁當然姑媽整得好食啲啦，始終食落去多一份親情喺裏面！」

除了品嘗賀年美食，Alfred亦分享遵從多年的習俗：「我屋企比較傳統，一定要着傳統老西、三件頭咁去拜年！我都係去到近年先同阿媽講唔好啦，而家我係藝人嚟嘛，着到好似做保險咁！不過諗返起覺得細個有呢個傳統，都幾得意嘅！」

去年Alfred入行十年，首次在紅館舉行一場處男個唱。踏入鼠年，他坦言希望再踏上紅館舞台：「我好想有機會開到唔止一場嘅紅館個唱！除咗工作，都有諗過行返個桃花運，不過我暫時將呢個重任交畀阿哥幫我頂一頂先，因為我想自己大個啲，開始Handle到自己嘅嘢先去Handle多個人！」