【今日疫情】前線醫護的控訴:生死籤喺不公開不透明下進行

撰文:鄺鈺瑩
出版:更新:
香港專職醫療人員及護士協會幹事劉凱文表示,醫護人員唔止口罩,連眼罩等防護裝備都非常不足。(影片截圖)

武漢肺炎擴散速度迅速,各間公立醫院陸續成立俗稱「Dirty Team」嘅防疫團隊工作,最新一集《今日疫情》請來香港專職醫療人員及護士協會幹事劉凱文,向觀眾講解下點解醫護人員對Dirty Team如此抗拒。「唔同病房為咗應對新型肺炎,以用生死籤去安排同事處理病人,聲稱話係抽籤,但好多時同事反映都好似唔係公開同不透明情況下進行,亦都係事後才被知會,有啲人覺得係內定。」

身為醫療人員嘅劉凱文表示,每日收工都會先洗澡再返屋企,入屋後會即時以1比49消毒,提到有醫院個安排醫生租住酒店作自我隔離,劉凱文表示:「醫管局係有安排,500元一日租住酒店,都有個別同事申請。」不過,佢亦都指出酒店其實亦屬高危地方,隨時將更安全變為高風險。

厚身外套唔方便日日清洗,專業人士教路大家穿着完之後可用燙斗蒸氣殺菌。

節目亦搵嚟汽車交通運輸業總工會主席陳兆華做嘉賓,提到市民搶廁紙等行徑,他說貨運方面,無論係跨境定本地都一直都供應充足,唔明大家點解會發生搶購廁紙。另外,他亦提到公共運輸交通工作的消毒情況。「巴士係請清潔公司負責,但做得足唔足係一個問題,因為唔係得一架車同時埋站,同埋一夠鐘就要出車。」陳兆華現時會在每個巴士站頭放置口罩,以保障司機的安全。