入行24年「遁地八」張智軒心淡離巢TVB:由始至終冇畀過機會我

撰文:
最後更新日期:

張智軒,或許你對這個名字感到陌生,不過有睇開TVB的一定會看過他的演出。現年42歲的張智軒,1996年加入第9期無綫藝員訓練班入行,在TVB工作了24年。來到今年,張智軒決定離巢TVB不再續約,結束多年的賓主關係。

張智軒決定離巢TVB不再續約。(受訪者提供)

張智軒離巢主因是TVB今年不停減少藝人出鏡機會,工作量大不如前,令到收入無法支撐日常生活的開支:「入行24年我都係爆show,閑閑哋可以做到100至200 個,每個月都有固定月薪應付基本生活需要,但係今年做唔夠。佢話如果想續約,就簽一年一個Show,即係冇月薪,有嘢做先搵你返去,我就話唔簽。如果喺電視台唔爆Show,根本冇可能生活到。」

張智軒將結束與TVB 24年的賓主關係。(IG/ @cheungrussell)

張智軒入行超過二十年,參演過無數TVB劇集,遇過的辛酸史多籮籮,例如冬天拍落水戲、夏天40度着羽絨拍古裝、連續一星期通宵拍劇,大庭廣眾給導演鬧等等他都捱過,只可惜都是以對白不多的閒角為主。他最為人所知的是在《十兄弟》中飾演「遁地八」一角,不過觀眾連他的名字都不知道,智軒坦言心灰意冷:「做咗咁多年,好多觀眾喺街上都係嗌我茄喱啡。問心我已經將每一個角色盡量做到最好,奈何暫時都未得到大家嘅認同。任何角色都已經做過,警察、古惑仔、大賊、律師、醫生、官兵,死屍全部都演過,剩係未做過主角。真的希望有人記得我不是張智霖,不是張敬軒,我是張智軒,希望有人記得我個名。」

+3
+2

原來張智軒多年前已萌生離巢念頭,他覺得TVB沒有給予機會,但因一班相熟的監製令他留低:「可以喺電視台做咁耐,完全係因為有一班相熟嘅監製肯用我,但係好多已經冇做。好多年前每一年簽約都係諗住唔簽TVB,由始至終都覺得公司冇畀過任何機會我。其實做藝員人工少待遇低都唔緊要,最緊要係遇到好角色同埋真係有人畀機會你。近幾個月,好多同事都開始cut show,公司裁員已經是鐵一般的事實。」

張智軒閒時會踢足球、游水、做gym,或在寵物店工作。(IG/ @cheungrussell)

對於被指是富二代、隱形富豪、生活無憂,張智軒否認並計劃好離開TVB後的生活,他希望可以繼續拍劇和登台,同時打理好經營了15年的寵物店:「我會擺多啲時間喺寵物美容方面,因為平時我唔需要去拍劇時,多數都會去寵物店幫手,例如送貨和接載寵物去美容院,希望可以殺出一條血路。另外,都係希望可以遇到一個好嘅角色。」

+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。