「以前心目中係諗住唱歌，係自己終身職業」，曹永廉看着自己95年拍下的MV如是說。問十個街坊，相信十個都知曹永廉是何許人，但他曾經是一個歌手，大家的反應是「吓，佢識唱歌？」、「幾時做過歌手呀？」不要怪觀眾善忘，皆因這是22年前的舊事，當年曹永廉就是以歌手身分出道。

柴九金句「人生有幾多個十年」，但曹永廉用了雙倍時間，終於在「星和無綫電視大獎」贏得「我最愛TVB男配角」，算是一個遲來的春天，而曹永廉在得獎感言上，激動地道：「上咗年紀嘅人都知我係唱歌出身，呢個獎證明我無轉錯行。」驟然間勾起了大家的回憶，他入行後曾推出過三張唱碟《情深款款》、《唯一的女神》及《不惜一切》，那時候的曹永廉外表斯文青澀，有點似台灣歌手張信哲，走的是情歌及Jazz路線，但當時是四大天王的年代，儘管斯文靚仔，歌聲醉人，也只是紅歌不紅人，為生計他開始拍攝劇集，首套作品是《親恩情未了》。

曾經將唱歌當成終身職業，但人生卻是要「捨」才有「得」，大家忘記了曹永廉曾是歌手，卻忘不了他在《雙面伊人》的奸角方德信、《公公出宮》的細雞陳小鳳，剛剛播畢《律政強人》智叔徒弟Duncan，甚至新劇《超時空男臣》也有他一席之地，升呢至第二男主角。《香港01》記者給阿廉看當年《唯一的女神》MV，他像看着前塵往事，上一世的自己。

曹永廉表示：「有咩感觸吖？其實時間過得好快，開心與唔開心嘅時間都係咁過，但我覺得真係要堅持。」聽落有點矛盾，他放棄了當歌手，卻一直堅持拍劇，才能成為無綫的綠葉王。他淡然道：「有時條路(唱歌)唔係咁行，轉咗第二條路(拍劇)，你咪適應佢囉，原來係柳暗花明又一村，其實依家係比以前更開心，各方面都開心。」

在無綫的潛規則運作下，劇集主題曲、插曲不是被星夢歌手如許廷鏗、胡鴻鈞包辦，就是留給男女主角一展歌喉，阿廉揀了拍劇，卻注定與再當歌手無緣，沒有半點遺憾嗎？「其實我真係無咁諗喎，依家我都集中係拍戲啦，我覺得亦有其他人唱得好好，咁梗係唱得好嗰個唱啦，我又無乜所謂嘅。」

至於男一才有得唱主題曲的問題，他也看得通透，甚至趁機大讚圈中好友蕭正楠，「我無諗到咁深入，每一個唱嘅…，佢哋都係揀個適當嘅人，我都希望有主題曲係啱嗰套劇，自己唱係咪唱得咁好，我又唔敢咁有信心，阿蕭(蕭正楠)唱多啲啦，佢唱歌幾好嘅，不過有進步空間。」

或許就是這種與世無爭的心境，令曹永廉外貌廿年如一日，根本看不出他的真實年齡，已經是半百過外的中年人。他笑言：「其實我真係好好彩，你話特別嘅保養，我真係無乜，同埋我哋呢行要捱更抵夜，食嘅食物都係街食，未必一定係有益嘅嘢，少少好彩啦。咁依家都會做多少少護膚，同埋後天食啲健康食品嘅。」「襟撈」、「襟老」兩種特質同時在曹永廉身上出現，相信總有一天他能步上男一位置，能為劇集唱主題曲，再續歌手夢。