開心速遞｜劉丹拍逾4000集處境劇：最開心多咗好多仔女

TVB處境劇《愛·回家 之開心速遞》長拍長有，即將邁向1300集，飾演熊樹根嘅劉丹（丹爺）絕對係骨幹靈魂人物。呢日宣傳活動佢就以另一身份「叉燒炳」現身，丹爺搞笑表示：「想整啲叉燒慰勞大家。」

見到丹爺心口圍裙寫住嘅「三多燒臘」字樣，真係回憶返晒嚟。丹爺話：「呢套戲開拍時，我就許下希望超越《真情》，到今日終於就嚟過，特別感動。」當年都有份拍《真情》嘅滕麗名，大讚丹爺keep得好：「阿爸真係完全無分別，我自己當年仲係小妹妹，會驚會怯，好在有班好前輩睇住，依家就一齊睇住班細路。」

當年《真情》播足1128集，陪住大家4年半時間，加埋古裝及時裝版《皆大歡喜》，《畢打自己人》以及3輯《愛·回家》，丹爺已經拍咗超過4000集處境劇，被封為「處境劇之王」滕麗名都驚嘆相當利害！丹爺表示：「其實每個角色都咁鍾意，最開心係多咗好多仔女，行到邊都有人叫我阿爸。」