【專訪】楊思琦圈外老公繼續保持神秘:佢唔需要幫手湊小朋友

撰文:
最後更新日期:

2012年,楊思琦誕下長女「穎穎」,母兼父職獨力撫養女兒。2019年,楊思琦自認再度懷孕,並透露過胎兒親父是圈外人,二人已在2019年在美國註冊結婚。2020年4月,楊思琦在IG公布囝囝Kody在2月已經出世,期後更對外宣布,Kody會如姐姐一樣跟自己姓「楊」。由她被揭懷孕、結婚、細仔出世,她丈夫的身份、姓氏、年齡仍然是一個謎。

場地:Lounge Hakuba

服裝:Per Me

髮型:Chris Cheng( IL COLPO)

化妝:jessicachan_makeup

「你好呀,恩琦妹」,記者說。「仲思琦妹?思琦媽喇!」她說。(梁碧玲攝)

記者到場時,「思琦媽」剛剛完成上一間傳媒的訪問,正埋頭苦幹蹲在行李箱前,喃喃自語:「呢幾套着咗,就放呢邊,而家係着......啊係,呢套。」只見行李箱中裝滿一套套摺好的衣服,有包好的放左,已「拆封」的放右,頗有條理。的確,通常藝人接受專訪,一個下午要輪流做好幾間傳媒訪問,密集式的應付不同記者提問,服裝都會帶上好幾套以作替換,一般都會有助手隨行幫忙整理,然而當日「思琦媽」卻只有自己一人。

「思琦媽」當日一口氣連續接受8間傳媒的訪問。(梁碧玲攝)

有「時裝版《阿信的故事》」之稱,由廣瀨鈴、岡田將生、藤木直人、松嶋菜菜子等主演的NHK第100套晨間劇《夏空》將於12月7日起,逢星期一至五於香港開電視播放,楊思琦獲邀為劇集獻唱港版主題曲《仲夏陽光》。楊思琦對上一次獻聲錄音,已經是去年一首講愛情的單曲《愛的森林》(2019),而今次《仲夏陽光》的曲風則比較明快和輕鬆:「而家疫情,我哋係需要呢啲咁鼓舞嘅旋律去振奮吓,同大家一齊加油!(老公有聽過?)初頭我有畀DEMO佢聽嘅,佢聽完之後都話好容易記呀,一聽就會記得喎,咁之後錄完我又有畀個初版佢聽,佢話好喎,即係佢都會讚我,我就冇諗過佢係好明確咁讚我,因為通常佢讚人唔係咁。」

楊思琦:「佢哋打電話邀請我唱嘅時候,我聽到已經好開心,即刻答應。」(梁碧玲攝)

老公神隱:「佢唔會習慣娛圈模式!」

2012年,楊思琦誕下長女「穎穎」,母兼父職獨力撫養女兒。2019年,楊思琦被曝再度懷孕,期後她公開透露過胎兒親父是圈外人,二人更在2019年在美國註冊結婚。2020年4月,楊思琦在IG公布囝囝Kody在2月已經出世,期後更對外宣布,Kody會如姐姐一樣跟自己姓「楊」。由她被揭懷孕、結婚、細仔出世,她丈夫的身份、姓氏、年齡仍然是一個謎,問她何以保持得如此神秘?她笑言:「佢唔係呢個圈嘅人,所以佢唔會習慣到我哋呢種模式,所以係佢舒服為主。」

記者八掛一問:「咁穎穎點稱呼你丈夫?」楊思琦即時答:「爸爸囉!」(梁碧玲攝)

能夠將丈夫的消息做到滴水不漏,保密功夫相當重要,記者特意向楊思琦請教當中秘訣,她想了一想,「其實都冇特別咋,都係順其自然,(上網都要特別小心?)咁你要問佢先知,我諗佢會識處理,唔需要我擔心,大家都成年人,(你自己嘅意思呢?)我意思係尊重佢嘅意思,我又冇話想刻意要去公開嘅。」楊思琦亦提到,自己並無因為其它人可以公開曬愛、大方露面,「我諗個個人都唔同嘅!所以冇話望到咩會有Hard Feeling(難受)。」

穎穎同你的丈夫如何相處?「佢哋會Whatsapp囉,會傾偈,係有溝通嘅!」(梁碧玲攝)

「思琦媽」肩負起照顧子女的責任

楊思琦表示,照顧一對仔女的責任主要落在自己和婆婆身上,「人哋就話生過一個之後第二個就會輕鬆,我會話畀大家知真係未必,可能係因為年紀嘅關係,隔咗8年再生原來係需要好多精力,(家姐難湊定細佬?)我諗湊細佬係要用多啲體力,細佬佢係好想郁動,就算我抱住佢,佢都左搖右擺,要同佢鬥扯,所以而家對手都有啲傷!」而由於疫情關係,8歲的穎穎需要長期留家,透過互聯網上課和交作業,反而令楊思琦更加勞氣,「未有網上教學之前我係唔畀佢接觸,咁佢好多時都要用(電子產品),我睇少佢一眼佢已經會轉咗頻道,就會迷失咗,要搵佢返嚟。(試過鬧得好勁?)係個語氣好嚴肅!」

思琦妹既係照顧小朋友嘅重心,同時亦都係家庭經濟支柱。(梁碧玲攝)

「唔好討論佢喇!」

雖然思琦妹有媽媽幫手照顧小朋友,但同時為家庭經濟支柱的她仍然需要努力工作賺錢養家,即使請家傭姐姐亦諸多阻滯:「有嚟過嘅,不過唔係咁啱!我覺得請工人係好靠命水,(分享下?)之前有位工人姐姐,可能(幫小朋友)沖涼嘅時候梘液用得太多,醃到個BB起曬啲敏感,係指阿家姐嗰時,仲有好多問題,好難一次過講晒,「咁,老公會唔會幫手湊小朋友?」記者問,楊思琦直言:「佢都唔需要幫手湊,主要都係我湊,(咁,穎穎點稱呼你丈夫?)爸爸囉!(你現時嘅丈夫同穎穎相處成點?)佢哋會Whatsapp囉,會傾偈,係有溝通嘅!(可唔可以分享下你丈夫對你做過最感動嘅事?)唔好討論佢喇,我哋講首歌吖嘛!」

睇埋專訪當日,思琦媽嘅靚相:

+3
+3
+3


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。