謝嘉怡失魂跌提款卡　大埔網友路不拾遺順利物歸原主

路不拾遺係美德，但有冇諗過有一日會執到藝人嘅嘢，可以同佢哋親自交收？有網友指自己執到一張提款卡，卡主姓名比較特別叫「TSE LISA MARIE」同應屆出爐港姐冠軍謝嘉怡一樣，原來呢個失魂魚真係Lisa﹗

Lisa之前已經講過自己相當大頭蝦，自爆經常會唔見嘢或者跌爛電話，可謂電話殺手，而今次就輪到唔見提款卡。有網友喺「大埔Tai Po」Facebook群組上載一張提款卡相片，問有冇人跌卡或認識卡主，卡主姓名係「TSE LISA MARIE」同港姐冠軍謝嘉怡一樣，咁啱Lisa又真係住大埔區。網友透過IG私訊聯絡Lisa，嘉怡亦有回覆指自己的確遺失提款卡，仲好快相約網友拎返張卡。