向華強和愛妻陳嵐（向太）今日（10/10）就欠債百億傳聞特別召開記者會澄清事件。記者會上向華強直斥一名YouTuber生安白造，又指謠言十分恐怖，幸好公司股價未有受到影響，而向太陳嵐更一度激動拍枱指對方有意造謠生事。

談到香港電影市道差，被問到是否因創作空間受到限制時，作為影壇大亨的向華強倒抽一口涼氣：「創作空間唔知，同埋啲手續都好麻煩，坦白講當年我拍電影，因為翻版猖獗，我嬲起上嚟就唔拍。到後尾翻版絕跡，之後就網上睇。而家就盛行睇短劇，變咗俾啲短劇打垮咗。變咗而家啲人習慣咗攞起手機就睇短劇，變咗每個時代有唔同嘅嘢。（幾耐冇入去戲院睇戲？）幾個月，之前睇《哪吒2》。」

而向太就表示：「始終夢想就歸夢想，理想就理想。事實我哋係生意人，你唔可能投資去幫人，幫我哋梗係想幫，但唔知道點去幫，你要使幾多錢去幫呢？可能使好多錢最後都幫唔到。因為市場太細，都冇辦法。佢係咁鍾意電影，你話佢唔想幫咩。其實唔只香港差，大陸都差，大陸都執咗好多戲院，但我諗一萬部，都有一兩部賺錢嘅。」