現年74歲的「大哥大」洪金寶縱橫影壇超過60年，拍過不少經典作品，但隨着年齡增長，身體狀況不如以往，近年受糖尿病困擾的他過着半退休生活，不時被「捕獲」親自到街市買餸，十分貼地，又相約好友聚會，樂得逍遙。近日洪金寶現身湖北黃石，與太太高麗虹一起舉行家宴，更獲當地四星級酒店老闆親自接待打點，27道菜盡顯豪氣！

洪金寶豪請27道菜　四星級酒店太子爺親自下廚接待

日前湖北黃石四星級酒店老闆小閔上載了一段短片，並寫道：「給洪金寶老師做飯啦。」據知小閔是當地唯一一間四星級酒店的太子爺，如今已接手家族生意成為酒店董事長，而洪金寶今次選擇在一間餐廳舉行家宴，更邀請小閔的團隊上門服務，多位星級大廚合力炮製總共27道菜，包括燉湯、蒸魚、炒菜等等，相當豐富！片中所見，洪金寶當日撐拐杖現身，雖然仍需要工作人員攙扶，但腰板挺直，最後更大方同小閔合照，而高麗虹全程陪伴在側，氣質出眾。

洪金寶回春捲陰謀論　洪天明親解「神秘液體」傳聞

洪金寶在2017年做完膝蓋手術後，近年多以輪椅代步，他曾在節目中解釋原因：「其實係因為膝頭哥痛我唔想行啫，去街市我都坐輪椅，我行得好快㗎，我老婆問我可唔可以唔好行咁快，唯一買餸就係娛樂嚟㗎喇。」不過去年一度傳出陰謀論，質疑洪金寶注射了「神秘液體」，因而回春，而洪天明就曾在《娛樂好好玩》中解釋：「其實網上有好多揣測，話有咩治療，其實冇嘅。因為拍嘢你唔會坐輪椅出嚟㗎嘛，大家要理解，因為佢咁多年嘅工作，咁多年嘅動作（戲），佢又肥，所有壓力喺晒膝頭度，佢膝頭痛呀，骨頭磨骨頭隻腳會好痛，所以佢咪選擇坐囉！」上月洪金寶與太太高麗虹亮相《第44屆香港電影金像獎》，精神非常飽滿！