【我不是男神】千萬點擊型男 26歲胡卓希：出街有人嗌我做男神
「我要將你拯救，逃離人類荒謬」Dear Jane今年推出的「都市愛情三部曲」，紅歌紅埋人。說的是MV男女主角胡卓希（Jason）及袁澧林（Angela），尤其是男主角Jason，憑著高大身型、臉上留鬚的滄桑Look，食正有人鐘意「佬味濃」嗰瓣，MV出街後越來越多人留意，他也直言：「出街都有人嗌我做男神。」
攝影：李孫彤
不過Jason好快再補多句：「但我覺得自己算唔上係咩男神。」留鬚的確好有型，俾人感覺好有歷練，兼且多一份成熟穩重，而Jason都明白自己的外型讓人有這種感覺，但他卻說被一些有魅力的男演員潛移默化，久而久之變到如此「滄桑」，「好似竹野內豐，或者張國榮咁，佢哋留鬚好型，但男神除咗外型，內涵都好緊要，佢哋咁啱兩樣都有；而我嘅年紀所有嘅故事未有豐富到好似佢哋咁。」
曾是「沒自信的毒男」
說的又是，26歲的胡卓希，事業剛起步，一切由「都市愛情三部曲」的陳浩然開始。故事出街之後，有很多迴響，除了大讚Jason有型，型得嚟都要捱下罵，「我試過俾觀眾粗口問候，話我對Angela好衰。」觀眾睇到咁入戲，Jason出街都被稱呼為陳浩然，或是「Angela MV嘅男主角」。但無人叫自己做胡卓希，會唔會好大獲？Jason就話：「叫我陳浩然都係好事，至少有人記得。」說話背後源自他3年前曾參與過港台電視劇《Y2K》，當了13集主角，但卻無人認得，讓他質疑過自己做得不夠好，3年後陳浩然話佢知，其實都要靠「天時地利人和」。
Jason講到自己入行，其實都是誤打誤撞。他形容中學時期的自己，在這年代就是「沒自信的毒男」，「我細個矮到我屋企人都覺得我咁就一世，為人又內向同自卑，平時我都唔係好出聲，就算後來長高咗再做Sale有人發掘做Model，我都唔相信。入行之後，我經理人都話我嘅性格唔係好適合，因為每次工作，面對嘅人都係全新，無時間俾自己慢慢嚟。」雖然性格慢熱，但條路自己揀，Jason而家都盡量變得積極少少：「盡量分享多啲，唔想大家覺得我好悶。」
唔介意要「捱」
由Model變做演員，Jason都話唔介意由頭嚟過。不過他坦言角色轉換，心理上都要有所調節：「做模特兒，所有人都係招呼自己一個，spot light都係照住自己；但做演員，就變咗做整個環境其中一個物件，無人再得閒招呼你，又唔能馬虎去做，做得好未必有人會賞識。」萬事起頭難，更何況做演員？Jason都明白這個道理，有了要「捱」的預備，喜歡演戲可以擁有第二人生、第二身份，「模特兒26歲係有點遲，但演員呢？20歲咪做20歲，40歲咪做返40歲囉。十年後做唔到咩成績，再算啦。我都慶幸自己好捱得。」
日後留一線
不論拍拖，還是生活，喜歡歸喜歡，現實還現實。Jason後來都很老實承認演藝路或多或少有風險，為人保險的他還是留了一線給自己，2年前開始幕後工作。「一次機緣巧合之下，認識咗一位導演，佢知道我鐘意影相，就俾我嘗試做下幕後，做廣告助理，做做下又幾鐘意。心諗如果萬一我做唔到演員，我都可以做返呢個崗位，反正我都好鐘意呢個工作。」Jason希望透過累積經驗，將來可以拍下電影。其實一個藝人識得多幕後工作，反而仲剎食啦！Jason又唔使驚嘅！
受到MV影響，總會覺得Jason係一個浪子。喜歡浪子，總會想叫他快快泊岸。都想親身證實，感情上，他又是否一隻「無腳雀仔」呢？Jason偏偏就用了大男人來形容自己，「我同陳浩然一樣，比較大男人。總會想另一半諒解自己，好似我做呢一行，有時候工作需要，可能同異性會有接觸，都會希望對方會明白，而唔係呷醋。」最想不到，「浪子」原來已找到一個體諒他的人。但係！要人理解感受，咁女朋友感受呢？Jason都立即補返句：「咁都唔會係對方完全遷就我嘅，大家都要付出。」唔，我代女朋友答：「算你啦！」