MIRROR演唱會前夕聲帶出問題 Anson Lo:醫生建議停工三個月

撰文:
最後更新日期:

MIRROR演唱會前夕,成員盧瀚霆(Anson Lo)聲帶出現問題,他表示呢幾日已盡量少說話。(葉志明攝)

人氣男團MIRROR將於5月6日(星期四)起一連六日舉行入行以來第二個演唱會,唔少鏡粉都十分期待。但繼日前姜濤在直播時自爆綵排期間暈倒後,成員盧瀚霆(Anson Lo)及Edan(呂爵安)亦相繼抱恙,情況令人擔心。

今日(4/5)Anson Lo與鄭欣宜、杜琪峯導演出席虛擬銀行發佈會時,聲線略顯疲態,休息期間亦不停飲水,他接受《香港01》訪問時透露原來聲帶出現問題:「醫生話可能因為最近用聲太多,所以都建議我兩星期唔好講嘢、停工三個月,但大家都知冇可能,於是佢建議除工作外唔好講嘢,所以我而家除咗踩台,都係用氣聲講嘢。」

日前在IG Story上透露情況。(影片截圖)

至於其他成員的身體狀況,Anson Lo表示由於排練時間唔多,所以有不時項目會重疊:「基本上全日都冇得休息,中間又要攝時間去Band rehearsal、試身,感覺好頻撲,所以大家都好似冇咩力氣,係好攰。」Anson Lo又表示曾打算為演唱會而操肌,無奈連休息時間都唔夠,他說:「我又冇覺得自己瘦咗,反而係肌肉少咗、冇咁大隻。擔心大家都覺得我瘦咗好似冇咩嘢睇,但瘦真係唔係我想要嘅嘢。」

Anson Lo喜與杜Sir及欣宜合作。(葉志明攝)

廣告中,Anson Lo首次與杜Sir合作,他仍記得拍攝當日,當杜Sir到場後,由於氣場太強,令所有人即時「硬軚」,而他後來趁休息時間上前作自我介紹:「好開心係杜Sir都知道MIRROR嘅存在,佢都讚我哋年輕有活力,可以帶到歡樂比佢,自己都好滿足。(有無請佢睇演唱會?)佢有話會去望一眼,睇一眼都已經好好。」

今個星期係母親節,但由於演唱會關係,Anson Lo預計無法與媽媽慶祝:「上一年都係,不過我會買花送去屋企比媽咪,同埋已經準備咗禮物,到時返屋企送比媽咪。」(葉志明攝)

點擊睇更多Anson Lo型仔照片

+20
+20
+20


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。