大叔的愛︱Stanley@MIRROR拒過份參考原版:驚演出時有太多影子!

撰文:
最後更新日期:

改編日劇《大叔的愛》(おっさんずラブ)的香港史上首套同名BL連續劇於4月底煞科,ViuTV將在6月底播放,現時幕後團隊正加緊趕工完成後期。九位主要角色中,人氣男團MIRROR的成員佔去三席,分別是飾演田一雄的呂爵安(Edan)、飾演凌少牧的盧瀚霆(Anson Lo)和飾演呂俊霖的「大表哥」邱士縉(Stanley)。

監製盧思麟(Tommy)早前接受訪問時,大讚Edan與Anson Lo表現遠超預期,令他信心大增。「阿田呢個角色好需要喜感,Edan係完全做到,佢有種親和力,當佢做完一啲表情或者一啲動作,你會覺得呢個男仔好得意,我相信播出街的時候,觀眾都會喜愛佢。而Anson Lo本人性格同阿牧都好似,多愁善感,有幾場戲我要拍佢醞釀情緒,佢真係喺現場喊出嚟,你睇住啲眼淚係咁滴,所以我覺得佢哋兩個好犀利,雖然拍劇的經驗不是太豐富,但係今次佢哋兩個都拿揑得好好。」

至於Stanley,Tommy亦指他演出不俗,完全做到角色設定的預期效果。「我而家睇緊啲First Cut,Stanley佢做得好好,我哋想鋪排佢做到嗰種近似韓劇貼心Oppa,去到後期佢做足,佢處理得非常好!」Stanley坦言加入劇組之前有收看日本原版,但又不敢看太多。「因為我驚會有好多(原版)影子帶咗入嚟。」

撰文:游大東

Stanley飾演的角色呂俊霖,原版是由金子大地飾演的栗林歌麻呂,即「春田田」與「小牧」於「天空不動產」的同事,但因為港版集數加場,所以呂俊霖的戲份會較日本版增加。(資料圖片)

Stanley飾演的角色呂俊霖,原版是由金子大地飾演的栗林歌麻呂,即「春田田」與「小牧」於「天空不動產」的同事,雖然工作態度散漫,但竟然獲得不錯業績,性格粗枝大葉,自從知道「部長」黑澤武藏(吉田鋼太郎飾)與黑澤蝶子(大塚寧寧飾)離婚後,主動追求蝶子,而港版飾演蝶子的,正是專誠由加拿大返港參演的簡慕華,角色名字叫慧珠,又名Francesca。

面對從演20年的前輩,Stanley早前受訪時坦言,開拍後第一次跟她對戲甚有壓力。「佢冇畀壓力我,純粹我好緊張啫,因為圍讀時候佢唔喺度嘛(返港後隔離,只能透過視像見面),我哋冇時間互相了解,所以第一次見面對戲嘅時候,我就好緊張,個人僵硬咗。」而飾演港版「部長」KK(翟國強)的黃德斌,Stanley也跟他有對手戲,他說德斌非常友善,故今次合作不覺得有壓力。

ViuTV新劇、港版《大叔的愛》已於4月底煞科,並將安排於6月底首播。圖中為9位主要演員(左至右):邱士縉、Asha Cuthbert、簡慕華、盧瀚霆、呂爵安、黃德斌、練美娟、楊偉倫、陳子豐。(資料圖片)

港版的集數有15集,較原裝日本版超出一倍,所以監製Tommy說,部份原版的旁支角色,在港版會有更多情節發生,角色亦更見立體,所以今次演出前,Stanley有讓自己看原版《大叔的愛》,卻又不敢看太多。「之前冇睇,為咗拍呢套劇而睇番,但唔敢畀自己睇太多,原因係我驚會有好多(角色)影子帶咗入嚟,同埋港版集數更多,我角色上嘅性格同感情線嘅描寫會增加,成個人立體咗。」他又指,繼《地產仔》的阿鹿後,今次是再演地產經紀,所以拿揑角色上已有基礎參考,但要控制力度方面要稍作調整。

「我就係覺得上次太瘋狂、太跳躍,跳到觀眾可能一時三刻未接受到,所以而家再去演(地產經紀)嘅時候,會貼地啲、人性啲,都會有啲位可能會誇張少少,但一遇到感情位要認真嘅時候,就會變番人性少少。」Stanley又指,導演、監製都會在拍攝前跟演員一齊交流,冀令演出更有張力更有節奏,「導演同監製係畀好多空間我哋創作,因為佢哋覺得,喜劇係應該大家一齊Jam,唔係死跟劇本,所以喺現場無論邊一個人都會交好多唔同嘅意見出嚟,令到件事好活潑。」

Stanley指今次在《大叔的愛》再度飾演地產經紀,但會按照《地產仔》阿鹿的基礎上稍為調整。「今次會貼地啲、人性啲,都會有啲位可能會誇張少少,但一遇到感情位要認真嘅時候,就會變番人性少少。」(資料圖片)

專誠由加拿大返港的簡慕華在《大叔的愛》飾演慧珠(Francesca),與Stanley有很多對手戲和感情戲。(資料圖片)

Stanley的角色在港版戲份增加,變相更有多創作空間,相反「阿田」與「阿牧」似乎要較為跟足原版,Edan和Anson Lo皆認為,在演繹角色時要偏離日本版另行創作有難度。Edan說:「(有沒有變化)呢個真係一個難題,我覺得要睇角色,例如Stanley嘅角色,同日本版唔係好似,所以佢就可以做多啲自己想做嘅嘢,但我個角色同原版好似。加上原版《大叔》好睇嘅原因,係主角田中圭嗰種表演力,所以好坦白講,我真係有參考佢,但盡量喺唔同嘅位加啲自己諗到嘅嘢。」

Anson Lo亦指自己有參考林遣都在原版的演繹風格,為投入角色,他做了很多準備工夫。「我覺得原版嘅阿牧社交能力都幾高,除咗大家So Called係暖男之外,其實佢都幾活潑,同埋都幾鍾意笑,唔係一個沉悶嘅人。」他又說,自己埋位之前都有向黃德斌請教,「我問佢,阿牧呢個角色點樣可以做到平易近人得來又活潑呢?佢就講一句:『誒,得㗎喇,你臨場Roll機嗰下就會入戲㗎喇。』其實佢畀咗好大信心我,成日都讚我哋,雖然我哋經驗好少,超級少,但係佢都會不停話:你哋OK㗎!好鼓舞。」

Anson Lo感謝飾演KK的黃德斌在拍攝期間,給他與Edan很多鼓勵。(資料圖片)

游大東其他《大叔的愛》報道:

大叔的愛︱監製盧思麟講港版點解加長:原著有啲角色故事線唔夠喉

大叔的愛︱簡慕華加國返港拍劇 與黃德斌三演夫妻:所有嘢好吸引

大叔的愛︱呂爵安經驗淺認緊張 盧瀚霆拍嘴戲前有準備:食薄荷糖

大叔的愛︱與混血兒Asha扮演親生兄妹 阿卵:我個樣好似外國人!

大叔的愛︱呂爵安造型有心思 Homme Plissé壓摺褲搭和服外套

同場加映:大姜的愛|MIRROR三角戀睇到手腳捲縮 呂爵安被姜濤挑逗變高潮眼

+54
+54
+54


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。