ERROR自肥企画︱何啟華遭整蠱跌落地窿 Mike導爆兩年半前已構思

撰文:
最後更新日期:

《ERROR自肥企画》自5月初在ViuTV首播後,迅速於網絡掀起討論熱潮,Google Trend的關鍵字搜尋率大幅攀升,連帶ERROR四子和負責幕後製作的「無制限OT編集団」人氣急升,他們的Instagram帳戶追蹤人數持續創新高,最有趣是,於節目中扮演Agent. L的導演曹梓沖(Alfred),現時的粉絲數目正邁向兩萬大關,而儼如「ERROR第五人」的「格仔導演」劉諾衡(Mike)亦已衝上6.6萬,更有支持者在facebook開設群組「格仔Mike導絕對應該有應援會」,相當巴閉,難怪有電視台中人講笑話:做幕後隨時容易紅過做幕前。

大量「估你唔到」的踩界內容,勞師動眾整色整水,只為博君一粲,絕對是這個節目令大量觀眾「入坑」的關鍵,縱觀過去十集,最能夠令觀眾翻睇再翻睇的第一位,必定是第四集「ERROR遊‧詐‧詭」出現的「地陷之計」。受害者「Dee哥」何啟華因誤信製作團隊會拍攝「ERROR流忍者」部份內容,在使出絕招「鳳凰不死鳥」朝鏡頭方向奔走的時候,身「陷」由薯片和發泡膠等防撞物料堆疊而成的大咕窿,在鏡頭下,全方位、多角度出醜,更肉隨砧板上,需高舉「我係×頭皮」標語,令台前幕後和觀眾笑到標眼水,難怪「阿Dee」高呼:「又呃我信任?!」事後「Mike導」透露,原來他們為這一幕大整蠱,由構思到落實,足足花了兩年半時間!

撰文:游大東

「阿Dee」何啟華在《ERROR自肥企画》慘遭經歷「地陷大整蠱」。(何啟華facebook專頁)

《花姐ERROR遊》是「Mike導」第一個「揸Fit」的綜藝節目,2018年年底在日本東京與大阪拍外景,2019年2月初播出,而這個「地陷大整蠱」的靈感,早在香港埋班籌備的時候經已出現,「冇錯,拍第一輯《ERROR遊》嘅時候,係有諗過呢個整蠱㗎喇!」最終要等到2021年,即兩年半後才能夠成事。究竟點解?

「Mike導」解釋,既然拉大隊飛往日本拍節目,當然不想隨隨便便拍些甚麼返香港,「當時覺得,我哋去到日本,人哋啲整蠱節目好厲害嘛,就想試下跟住拍番一模一樣嘅嘢,最後我哋揀咗跌落窿入面咁樣嘅環節。」他說,當時並沒有計劃鎖定阿Dee為目標,「係諗住先有人應承咗我哋,跟住先再安排整蠱邊個嘅,唔係一早計劃咗畀阿Dee嘅。」可惜因為預算問題,令整蠱大計需要擱置。

「Mike導」劉諾衡透露,在《ERROR自肥企画》出現的「地陷大整蠱」早於兩年半前已構思。(instagram.com/soaplau)

「當時《花姐ERROR遊》嘅Budget比較緊迫,不足以令我哋去進行呢件事,跟住就冇咗。」最使錢的環節,是場地和找人挖地的薪金。「喺日本拍嘢,需要有極詳細嘅計劃書畀當地嘅製片,佢先會幫我哋做到嘢,冇啦啦話想喺人哋嘅地方話要掘窿,好難做到,最後收到覆番嚟係話人工同埋場地加加埋埋好貴,一聽到都知道唔會拍到落去。」有幾貴?「Mike導」說,如果當時落實在日本完成這個整蠱環節,製作成本大約足夠開拍兩集《花姐ERROR遊》。

結果一等再等,等到2021年,因為ViuTV決定開拍《ERROR自肥企画》,這個「地陷大整蠱」總算能夠再度啟動,並於元朗某處完成拍攝,「Mike導」坦言,今次算是一次極滿意的「自肥」舉動。「呢個Item一直都想拍,最後靠自己嘅團隊一手一腳做到,所以好爽。」「Mike導」又透露,周一晚(17/5)播出的《ERROR自肥企画》第11集「BTS」,將會公開更多這個大整蠱的構思理念和細節,提醒粉絲緊記要準時收看。

點擊下圖,欣賞更多阿Dee在《ERROR自肥企画》的型仔相和搞笑相:

+11
+11
+11


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。