Joe Junior變御用神父 69歲未心灰:做主角要排下隊!

撰文:
最後更新日期:

早前網民熱烈討論TVB一系列的御用演員,御用傻仔、保安、觀音,就連中風者都有,真係要成立一個「御用系」,廣集整個電視台的御用人才啦!話口未完,「御用系」就要再添一員啦!最近播出的兩套劇集《巾幗梟雄之諜血長天》及《流氓皇帝》,有眼利的網民就懷疑自己思覺失調,點解?因為兩套都見到Joe Junior都係做神父,不禁令人覺得「媽呀!我很亂呀!」其實Joe Junior過往亦多次都做到神父、傳教士的角色,真係名符其實的專屬神父演員呀!

就咁睇呢兩張圖,大家又估唔估到邊套打邊套?

神父角色陸續有來

事後就問到Joe Junior,做咁多次神父,似乎會好悶喎?他就非常樂觀,表示:「拍劇好好玩,做神父唔會悶!我嚟緊係《老表,畢業喇!》都會做神父㗎!同安仔(郭晉安)一齊,仲會唱歌!」身為葡中混血兒的Joe Junior,有著外國人的外形,操流利廣東話,所以監製要搵人做神父,Joe Junior必然是首選,所以他都好開心:「有監製諗起我就開心㗎啦!有機會就唔好放過嘛,搵餐飯食吖嘛!有得拍兩集就好好,雖然唔係啲咩主角,有主角做我都想,但我就要排下隊。總之無話咩悶唔悶嘅,專心工作就好。」Joe Junior仲好開心分享到在《同盟》有機會做下奸角、食食雪茄;而且希望下年為TVB工作20年會有金牌,甚至再做多10年,拎30年金牌!

Joe Junior反而無覺得做咁多次神父會好悶,仲好enjoy!(資料圖片)

無宗教衝突

幸好Joe Junior本來是天主教徒,所以做神父都輕而易舉,也不會因為宗教信仰與角色有衝突。不過Joe Junior自己講到與太太的宗教觀大有不同:「我老婆結婚之前就已經信觀音,(咁大家走埋一齊好有趣喎!)係有趣㗎,但結婚時都中西合壁,而且我覺得咁樣無所謂,大家都係互相尊重,只要最後件事都係出於有個善心,咁就得嘞。就算平時我開劇拜神,我都會上香㗎!出於善意就無問題。」另一方面,Joe Junior特別講到自己一早已經出去闖過,唱唱歌,所以有得拍劇就好;接住2017年,Joe Junior踏入歌壇50年,他坦言夢想成真,在伊館開《樂壇之寶50周年演唱會》。Joe Junior為人真係樂觀呀!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。