與柳應廷Jer開live騷 林二汶唔知咩係MM7:點解咁多人打?

撰文:黃梓恒
出版:更新:

林二汶 與 Mirror 阿Jer (柳應廷)昨晚於ChillGOOD TV ,由黃丹儀和KB主持節目作現場直播,兩人分別獨唱及合唱多首好歌,林二汶更挑戰選唱Serrini《網絡安全隱患》,唱出另一種味道,被網民大激讚,狂於留言區打下MM7,人靚聲靚、歌迷又大讚阿JER係金Jer 無論樣及聲線都迷死人,節目引來近萬fans捧場。

節目引來近萬fans捧場。

唱歌之間,兩人不時回應歌迷留言問題,二汶第一個就問:「咩係MM7,點解咁多人打MM7?」阿Jer 就幫忙解畫: 「係速成碼,係個「正」字囉。佢地想打得快,依家就會用MM7代表個正字。」二汶話,「哦,原來係咁,多謝大家讚我地正呀!哈哈」

阿Jer 及二汶今年都分別開過演唱會,歌迷留言問他們放假最想做什麼,Jer表示 :「多數會睇電影,不用工作就拍拖。聽朋友講,去大自然可以散走壓力帶走唔開心,所以也準備遲下試下」,而二汶就話放假最想乜都唔做,追劇睇電視,不過非常認同大自然力量,所以提議大家夏天最好去沙灘踏沙。

好深情。

歌迷又留言,叫兩人 合作唱歌之外,最好下次試下一齊做個史詩式跳舞live ,二汶未被嚇倒,笑住話,「我從來都係一個dancer,我可以一字馬架!可以做呀!阿 Jer就話其實最大心願係同二汶有首合唱歌,跳舞都可以:「不過我排舞好麻煩,我記得比人地慢,所以經常排排下會狂叫尖叫,記唔到停晒喺度㗎!我班隊員都已經習慣咗我,一排舞就會大叫,佢地唔理我,由我叫......」 對於Jer 話願望係有首合唱歌,林二汶就幽默回應:「我願意」。

佢兩個跳舞會點?

談到兩人其實最鐘意什麼香港歌手,林二汶說自己鐘意梅艷芳及張國榮,經常出騷前都翻看阿梅哥哥合唱的《冰山大火》為自己增加能量,而Jer 就表示,偶像是Supper Moment 及 Eason,都是他學習對像,希望可以唱歌像他們有感染力,溫柔動聽。Jer 透露,最近忙於拍新節目《調教你MIRROR》,「會有新一面給大家看,  我哋全部都唔化妝,素顏上鏡。話晒係偶像組合,平時花姐都要我哋好靚仔,如果打扮差,花姐會鬧,今次攞正牌不用打扮,真面目示人,都幾得意。」二汶就表示,她正為其他歌手做唱片監製,經過去年《全民造星3》訓練,她信心大增,所以也做得非常開心,至於自己新歌,就完成監製工作才進行。

最近DSE試剛完結,KB叫他們兩人鼓勵一下考生,二汶說,「我19歲未讀完書就入行,現在也覺得當時不應該放棄進修,學業是重要,但考完就要放下,「DSE 考完㗎啦,唔好諗返轉頭。」

Jer 就認為,「考得好唔好都唔應該唔開心,條條大路通羅馬,向自己鐘意的夢想及目標進發才最重要,成績係其次。」 最後兩人合唱《剎那的烏托邦》送給所有考生。

+6