土豪鬧人一定要用錢掟人？　原來粵語殘片已經係用呢招！

無綫賀歲劇《財神駕到》，由黎耀祥及單立文擔正，劇情講到因財神疏忽職守，令大好人祥仔要窮死一世，而單立文雖然衰格口賤，卻能大富大貴。為了突顯單立文土豪一面，劇中突兀加入他用錢掟人的情節，而之後他在另一齣劇集《踩過界》中，也是用錢掟王浩信，其實炫富有大把方法，仲用錢掟人？過時啦！

用錢掟人的始祖，要數到粵語片年代，1965年的《原來我負卿》，謝賢以為嘉玲嫌棄他窮而離開他，其後謝賢發跡後，即用大疊鈔票侮辱前度。至1986年的電影《英雄本色》大哥成，亦曾用錢掉向mark哥，至今仍然是經典場面。至於單立文在電影《賭俠》中，他飾演的侯賽因，也曾將錢掉落地，大肆羞辱華仔，數數手指該片已是26年前的出品，但無綫對「掟錢橋」卻樂此不疲，先後在《財神駕到》、《踩過界》，以及早前的《律政強人》及《巨輪II》也有相似的掟錢情節。

單立文在《財》劇中，基本上衰格到無朋友，在街頭賣鹹魚時，一斤只會俾12両，還在魚肚放入石頭，又試過搶走乞兒兜的碎銀，偏偏卻能中上馬票，跟着做生意一帆風順，成為全港十大富豪之一。不過江山易改，本性難移，暴發後經常炫富，到西餐廳order鴨腳扎，並取出大疊鈔票撒向空中叫人搭的士買外賣給他。兒子見到別的小孩手中玩具飛機，他再用錢笪人，向小孩父母買下玩具。

除此之外，單立文在劇中爆出不少刻薄金句，包括「財可通神，錢係萬能」、「唔睇住就偷懶，唔吼實偷米添呀」、「窮鬼有個貪字鑿喺額頭」，句句夭心夭肺，再加上單立文的招積樣，成為網民一邊鬧一邊卻喜愛的角色。單立文今年可謂豐收年，除了8點檔的《財神駕到》，還有跟王浩信合作的《踩過界》，而飾演財務公司老闆的他，亦有用錢掟盲眼的律師王浩信，更爆出一句「有錢盲嘅都識得開眼」，看來劇集出街後又會被網民cap圖。

其實除了單立文在兩劇中會土豪式用錢掟人外，早前熱播的《巨輪II》，劇中的社團大哥鷲哥吳岱融，就爆seed鬧李佳芯「成個地球都知妳係乜，臭雞」，更被網民cap圖洗板，而且鷲哥還有後着，摑了李佳芯一把，再將大疊銀紙掟向對方，雖然鷲哥演得十分有霸氣，但條橋就似乎舊了少少，熟口熟面。

不但《巨輪II》出現用錢掟人畫面，另一齣劇集《律政強人》原來亦有近似橋段，劇中廖啟智跟前妻李璧琦鬧翻，在離婚前重重摑對方一巴，再用錢掟李璧琦還嫌未夠皮，繼續成喼錢倒落女方頭上。一條橋無限Loop，看來編劇要再諗新橋，才不會流失觀眾。