【赤口】Joe Junior唱賀年歌 新年感恩:賜咗一個好老婆畀我

撰文:
最後更新日期:

每逢大年初三,不少人為免「好嘅唔靈醜嘅靈」,聽到初三「赤口」易有拋撬,一般都不會出門拜年。其實,只要心有正能量,往好的方面想,又邊會咁容易會嗌交?就算嗌交,咪當間唔中嘈下,擦出下新火花!為了令大家心情變得更好,香港01為大家送上有「御用神父」之稱,外表慈祥,人見人愛、車見車載的Joe Junior獻唱的新年賀歲歌。信我,長輩說話有時不無道理,睇完會覺得好治癒。

因為信仰的關係,Joe Junior深信只要一心向善,上天唔會待薄你。(資料圖片)

大家以為Joe Junior係外國人,不會特別慶祝新年,但Joe哥哥話你知:「好多人都以為我係澳門出世,我都係獅子山下出世㗎,都會賀新年㗎!」所謂入鄉隨俗,Joe Junior的家人多在美國,在香港過新年,感覺都冇咁孤單啦!

除此之外,做開神父的Joe Junior,本身就真係信開天主教,但他深信「神愛世人」這個永恆道理,所以待人處事向來都比較寬容,更包容其他宗教。他所娶的太太就是一個實證,不過講之前,Joe Junior先放一放閃光彈:「我覺得上天好好,賜咗一個好好老婆畀我,為我打點一切。」記者都被Joe Junior殺一個措手不及,眼鏡都嚟唔切戴…之後Joe哥哥先入正題:「我老婆信觀音,佢拜神我都會跟住去嘅。其實好多宗教都係導人向善,所以我都冇乜所謂,會尊重其他宗教。」

要對任何人都有包容之心,真係並非人人做到。與此同時,明明信天主教,跟老婆拜觀音,唔會畀人質疑咩?Joe哥哥:「有人咁樣問我,我就問返佢:『咁你信唔信個天?』佢話信。我就會話佢好勁,因為天上嘅神都信晒,就連我媽媽都信埋。(咁如果佢話信自己呢?)咁就自罷自為囉,個天係會睇住我哋㗎嘛。」Joe Junior話咩宗教都唔緊要,最重要心入面有個「善」字。

Joe哥哥凡事包容的心態真的很值得大家學習。不過講還講,但人善總會被人欺,點都會有啲唔開心嘅。咁Joe哥哥又會點解決呢?不意外地,他的回答非常正能量:「上帝為你關閉一扇門,必會爲你開啟另一扇窗。所以唔洗灰心㗎,上天總會陪住你。」

聽完Joe Junior呢一番說話,係咪充滿正能量呢?啱啦!新一年有個新開始啦!Yeah!

Joe Junior與太太結婚30年,依然好似糖黐豆咁。Joe哥哥仲話有呢個老婆,係上天送畀佢嘅最大禮物。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。