肥媽（Maria Cordero）今晚（25/9）以嘉賓身份現身大埔亞洲電視總台出席《亞洲小姐競選2021決賽》，肥媽接受訪問時表示：「今晚咁高興一陣我會上台唱歌，會唱啲喜慶嘅歌。乜大家唔記得咗咩，個個以為我剩係識得煮飯，其實我係歌星嚟㗎，哈哈！（出席亞視節目，有否知會無綫？）阿志偉佢知㗎，連我哋主席都知，我哋唔會唔知而去做嘢嘅，咁所以我哋一定有通知。而且佢哋都好樂意我哋亮相其他電視台，因為而家係百花齊放嘅時候。」