Anson Lo以阿牧造型現身品牌活動　神徒：咁可愛得㗎咩？

受強烈熱帶風暴「圓規」影響，天文台亦預告在今日（12日）下午較後時間考慮掛八號波，不過仍然無阻「神徒」見教主Anson Lo（盧瀚霆）嘅決心。Anson Lo今早現身尖沙咀出席時裝品牌活動，雖然店鋪外全部圍上圍板，只放行150名幸運兒企入粉絲區，但仍有多名神徒在圍板外，希望見到教主真身。

一早預告會以舒適造型上陣嘅Anson Lo，身穿粉藍色衛衣及黑色運動褲，再加上黑色髮色，甚有《大叔的愛》阿牧感覺，在場不停有神徒大叫「你今日好得意」、「咁可愛得㗎咩？」Anson Lo先在店內與品牌高層打招呼，再步出店外讓傳媒拍照，期間擺出「AL」手勢，又不忘與高層一齊玩Megahit Challenge ，而神徒則不停「Uh Oh Uh Oh」。Anson Lo之後返回店內拍照及訪問，由於工作人員極多，有神徒視線被擋，故頻頻大叫「自肥可恥」、「放低部電話」。