節目巡禮2022丨大搞J2踩界電視城玩探靈　進取到用VR技術親臨其境

無綫J2台由C君接手出任創意總監後，今日在節目巡禮明顯有大改變，C君親自介紹J2之後無論台前幕後都大幅降低平均年齡，不再是「老人院」。

TVB早前的清談節目《代溝關注組》，被批評是加入肥媽的《後生仔傾吓偈》，不過在節目巡禮就見到J2台新風氣。其實之前已傳J2為迎接台慶月會推出數個節目，今日亦終於證實，鄭子誠以經典聲線與陸永主持《邊度都有陰謀》；後生仔繼續是J2主力，包括有余德丞及林俊其訪問靚女KOL的《真女神轉生身》、林正峰就負責搜羅便利店材料，讓名廚保哥煮出美食，再拎去識女仔。至於挑戰TVB尺度的探靈節目《搵鬼去電視城》，會踩入鬧鬼的男藝人休息室、服裝間及古裝大街等地方，過程有陰陽眼師傅陪同，更進化至配合VR技術，觀眾可以用VR眼鏡親臨其境，比ViuTV《入住請敲門》更進取。