【黃宗澤前度】甄詠珊頂父債15年 從無埋怨:人在江湖,身不由己

撰文:
最後更新日期:

雖然甄詠珊暫時在TVB未有劇拍,但一直都有參與電影演出,在電影《掃黃》裡更做女主角。

最近TVB簽了不少新藝員,雖然大多是來自永恆電視台-亞洲電視,但能夠在TVB看到更多「新」面孔,未嘗不是好事。其中一人就是甄詠珊,她去年12月簽約TVB,至今已經兩個月。與此同時,近日有傳媒報導甄詠珊過去15年都為家人負債,如今終於還清,如釋重負。加入TVB的目的,是為了完成多年來的夢想,希望事業可以有新的發展。

甄詠珊12月簽約TVB後,隨即很興奮地參與只有公司員工可參加的盤菜宴。

甄詠珊簽TVB兩個月,她表示暫時未有工作,講到公司簽約時未有講過實際時間可以拍劇,她自己的心態就是:「拎到張入場券就已經好開心,自己一直都好想有機會拍到劇,都好期待。」在TVB暫時未有工開,甄詠珊透露過往都在內地工作,上節目兼拍劇,收入都算不錯。既然內地都有工作,為甚麼甄詠珊還想加入TVB,而不專注在內地搵真銀賺更多人仔呢?甄詠珊堅定地說:「其實入TVB係我咁耐以嚟嘅夢想,錢唔係最重要,我由加入娛樂圈到依家,感情上有唔同嘅經歷,自己依家算係由0開始,想更多人知道我想做啲乜,自己都好珍惜呢啲機會,所以錢唔係我最關注嘅事。」

近日有報導講到,甄詠珊父親因為97年金融風暴的關係而破產,甄詠珊為了幫補家計,當時16歲就要半工讀掙錢,去到半途更因為兼顧不來,而要輟學全力打工。回想那段日子,甄詠珊沒有半點埋怨:「當時係有諗過,點解佢哋(家人)唔識得去積穀防飢,但慢慢大個就發現,其實有好多事都係『人在江湖,身不由己』,要遇到金融風暴都冇得你揀,都冇辦法。唯有學識去面對,而唔係放棄。」

一個16歲的女仔,年紀輕輕就要放整副心機去賺錢幫屋企,比起一般年輕人,甄詠珊失去了很多時間和青春,至少不能趁年輕去實現夢想,她坦言年輕時確實很羨慕身邊的朋友:「我有幾個朋友,佢哋都好無憂無慮,都唔使好似我咁早就投身社會。不過大個就覺得,我要多謝呢段過去,呢啲都係我嘅經歷,或者會對我之後做戲有幫助呢,做人係要Positive啲嘅。」

甄詠珊周不時都會北上工作。

家人的債,甄詠珊用了15年還清。對她來說,目前的負擔比以前輕了許多。不過,就算目前都有收入,甄詠珊在錢財方面都沒有鬆懈過:「因為做呢行,賺嘅錢一時多一時少,所以一直都節衣縮食緊,(有冇限自己一個月用幾多?)咁又冇,但唔會有太多物慾,買嘢都要諗下有冇用先買。」這麼的話,應該會慳埋好多?甄詠珊卻說:「又唔係,都要畀家用屋企,儲到嘅錢唔會好多(會畀幾多家用?)又唔係用幾多去計,始終個個月收入唔同。我自己本身就算飛黃騰達都好,都唔會好想去買車買樓買名牌。」甄詠珊如此說,當中原因都是因為她還是很孝順,將賺到的錢用來買樓,給予家人有個安樂窩,「都想佢哋有個好嘅瓦遮頭,咁樣我就已經好滿足。」

甄詠珊如今少了負債的重擔,成了她事業再衝刺的動力。她除了簽約,依然選擇唱歌。就算現今的唱片業存在大量隱憂,她坦言想繼續做,打算推出流行風格的福音歌,又想創作一些讓大家有共鳴的音樂。為了讓公司覺得付出有回報,甄詠珊熱切希望自己新一年會有更多工作:「希望為公司拍多啲戲,等公司唔洗擔心我,做到個好成績。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。